Porto de Cabo de Cruz, un referente na vela galega

Parecía un soño, un raio de sol perdido, un conto das rúas, das xentes, pero nunca unha realidade. O certo é que estamos a ver unha das obras de impulso de Cabo de Cruz máis grandes de toda a historia local. Imos a ser un referente, un punto de encontro en Galicia e unha visita obrigada para embarcacións de todo o globo. O que parece ser que somos é a referencia náutica no Concello de Boiro. En números estamos a falar dunhas 750 prazas de amarre sumadas a unhas instalacións que darán cabida á mellor escola de vela de Galicia.

Estas son as espectativas do Club Náutico de Boiro que contará coa colaboración do Centro Internacional de Navegación da Arousa (CINA), unhas das escolas clave no Estado español que leva case un lustro dando formación a regatistas en tódolas categorías e clases.

Cando rematen as obras no dique de abrigo da dársena dará comezo o proxecto da escola. Así se fixo saber na xuntanza deste pasado fin de semana na que as caras de entusiasmo fixéronse notar no seo do local. E que Cabo de Cruz é un lugar que conta cunhas características clave para a execución deste proxecto, así coma as augas que nos bañan, perfectas para a práctica dos deportes e actividades do mar. Por iso as entidades locais pensan que co respaldo doutras institucións de fóra farán que esta iniciativa saia adiante con máis forza.

De feito, a CINA, socia do Club Náutico de Boiro xa anunciou a inclusión na súa oferta formativa, diversas actividades na dársena crucense e mesmo propóñense traer alumnos de Madrid e Valencia ata Cabo de Cruz para tal fin. Asi mesmo, esta entidade afirmou levar o nome da nosa vila non só pola xeografía española, senón atravesar fronteiras e amosarlle as nosas instalacións a países coma Francia e outros moitos.

A entidade boirense pretende captar socios con esta situación e anuncia que a cota manterase ata setembro para que por só 60 euros, os socios poderán optar a un amarre dos 150 que hai previstos para a primeira fase do proxecto.