Escribo isto aquí porque estou totalmente indignado cun deporte que sigo dende fai bastante tempo e isto fágoo dende a miña posición de espectador e non de administrador. Trátase da fórmula un. Todos sabemos que este é un deporte onde se moven moitos millóns de euros, existen moitos intereses tras cada pequeno xesto e sempre pode haber unha man negra detrás de todo. Pero a pinga que colmou o vaso foi neste pasado Gran Premio de Europa na cidade de Valencia.

Todos os que seguimos este deporte día a día, sabemos quen é Lewis Hamilton: un trampulleiro. Todos acordamos como nun grande premio con chuvia, onde se saíron da pista uns catro ou cinco coches, de súpeto sae unha grúa que o pon na pista a el só. Todos acordamos a etapa cando Fernando Alonso, bicampión mundial, comparteu escudería co inglés tivo un trato moi diferente ó del. Todos acordamos cando tras unha carreira, e logo do envío dun vídeo dun afeccionado, a dirección de carreira tivo que sancionar a este piloto. Todos acordamos un Gran Premio de Brasil cando por arte de maxia o piloto Timo Glock perde 30 segundos nunha volta para que gañe o mundial Hamilton, etc. En fin, e podería seguir así ata aburrir do feixe de trampas e sospeitas que se lle permiten a este piloto ó longo da súa etapa na F1.

Pero a deste domingo foi máis alá. Sitúovos: accidente espectacular de Mark Webber no que podería perder a vida facilmente debido ó golpe levado. Non se sabe como sae o coche de seguridade ou safety car e detrás del o coche médico ou medical car para atender ó piloto de Red Bull. Pero isto todo está dirixido por un monigote chamado Charlie Whiting que mete ó coche de seguridade detrás de Sebastian Vettel (cabeza de carreira) e diante de Lewis. Como todo piloto sabe, ó safety car non o pode adiantar ninguén excepto o fillo pródigo: Lewis Hamilton, cousa que fixo en contra da normativa.

Pero non foi así cando Alonso cumpriu as normas perdendo uns cinco ou seis postos deixando pasar a tal coche. Pois ben, o que fai a dirección de carreira é despois de deixar pasar ó pé de 20 voltas e darlle tempo ó inglés a gañar metros entre o seu predecesor, mételle un Drive Through que non lle afecta en nada ó piloto de McLaren. Pero si ó resto de pilotos que lles meteron cinco segundos trala carreira e non en tempo de voltas como deberían. Este feito pode decidir claramente un campión do mundo, que todo apunta a que este ano será o inglés de McLaren, xa que aquí o que ten padriño bautiza e o que non queda sen nada.

Isto indica que o sinal de televisión está controlado por Bernie Ecclestone, ou sexa que todos vemos o que el quer que vexamos, e logo o señor Whiting decide el mesmo as normas, xa que neste deporte non existen. Ou mellor dito fanse despois de que Hamilton as incumple (caso dunha inmerecida Pole Position en Canadá por quedar sen combustible). E quero chegar ó punto de que todos estes infractores son ingleses que se cubren as costas entre sí e que barren sempre para a casa emporcando a imaxe da F1 en todo o mundo.

Obviamente tódolos xornais do mundo excepto os ingleses, poñen a estes personaxes coma uns tramposos e uns falsos que están facendo deste emocionante deporte, algo digno de apagar a televisión.Dende aquí e dende a Asociación do motor do Barbanza queremos mandarlle ánimo ós pilotos españois: Fernando Alonso, Pedro Martinez De La Rosa e Jaime Algersuari. Ánimo!

• Noticias relacionadas en: Notas de prensa, Novas

Xa son moitas as novas de diversos xornais da comarca que nos mostran o que acontece cada noite de movida en Boiro e os cidadáns comezan a estar un pouco fartos. Nesta fin de semana, entre outras cousas, houbo unha denuncia a unha pandilla de mozos que entraron nun local rompendo cousas para lle pegar a outro que escapaba deles. Esta era a nova que tiñamos por exemplo, na Voz de Galicia.

Pero a cousa non queda só ahí. Un sábado pódense ver auténticas barbaridades, faltas de educación e respecto e moitas outras cousas máis. O que máis sofre, se cadra é o mobiliario urbán coa ruptura de sinais de tráfico, macetas, árbores, coches raiados, etc. Isto tamén se dou este sábado na rotonda da movida onde había tirado unha árbore arrancada de raíz e un sinal de tráfico enriba da acera.

Dende o concello indican que non é para tanto a cousa e que a seguridade se ve respaldada coa presencia da Garda Civil e da case nula presencia da Policía Local por falta de efectivos. Pero asegúrolles ós mandatarios de que coa cantidade de xente que hai en Boiro e co vandalismo que se produce nas noites de movida, non hai moito que facer en canto a efectivos policiais.

Porén, as medidas para que isto non pase teñen que ir por outro lado, se cadra máis á concienciación da xente e á aplicación dunha lei máis dura que faga pensar antes de romper algo. Con todo isto, quen as vai pagar van ser os hosteleiros que verán mermados os ingresos o día en que a xente se canse de tantos problemas e se vaian a outro sitio.

• Noticias relacionadas en: Notas de prensa, Novas

Despois dunha morea de queixas postas na entidade do Sergas, os veciños de Cabo de Cruz seguimos na mesma este novo verán. Trátase de que nos quedamos sen doutor no seu merecido mes de vacacións e o Servizo Galego de Saúde fai oídos xordos ante as queixas dos cidadáns. Pero Manuel Dominguez, o presidente do Club de Xubilados de Cabo de Cruz fai un retrato case perfecto da situación ante tal indignación: «Están discriminando a Cabo de Cruz, queren acabar cos poucos servizos que temos aquí», indica o presidente.

Namentres que da cadras das súas palabras, indícanos na placa da Casa do Mar que o edificio pertence ó Estado español, concretamente ó Ministerio de Traballo. Isto é porque xa son moitas as cousas que molestan no seo da terceira idade crucense como afirma este home: «Mira, deste sitio acaban de botar á asociación A Unión, que non lle facía mal a ninguén, e como a xente non se mova Cabo de Cruz acabará quedando sen servizos para sempre, iso hase de ver. ¿Non se dá conta a xente de que aquí non queren deixar nada, que queren que morra este edificio?».

De súpeto, comeza coa busca de culpables sobor de todo no asunto do médico, aínda que tamén critica que o novo Centro Social non estea situado na Casa do Mar, xa que como Dominguez di, se as instalacións estivesen coidadas outro galo cantaría. «Eu véxoo moi claro, o Concello non se preocupou por nada, quixo facer o centro social noutro lado e pouco a pouco aquí, onda o peirao, onde está a vida de Cabo, quedamos sen nada. ¿Por que noutros sitios poñen substitutos para os médicos e aquí non? Eu creo que é porque o Concello non insiste o suficiente».

Logo, as queixas son para a desfeita do Sergas na nosa vila: «Hai persoas maiores que non teñen quen as leve a Boiro; aos que mandan iso non lle importa, pero é así» e remata dicindo que: «Hai que protestar, a xente da Unión xa o fixo e aos xubilados tampouco nos gusta que nos quiten o médico así como así».

• Noticias relacionadas en: Foto Denuncia, Notas de prensa, Novas

No día de onte houbo unha xuntanza entre os técnicos de Portos de Galicia, as entidades de Cabo de Cruz e mais os rexedores locais, alcalde e tenente alcalde. Na reunión tratáronse varias cousas, pero a principal foi o pequeno retraso que parecen levar as obras do porto debido a varios obstáculos que xurdiron tralo plantexamento dos prazos estimados.

As explicacións de Deira e de Ares foron que a ampliación da escollera tiña que dar remate nestes vindeiros meses de xullo e agosto, pero iso non será posible ata polo menos o mes de outubro según as explicacións dos técnicos. Pero aínda así a xente saíu convencida de dita reunión, xa que se explicaron punto por punto os pasos que levamos dados e os que se darán desta obra.

Sigue leyendo… »

• Noticias relacionadas en: Notas de prensa, Novas, Obras e Proxectos

O nome de Cabo de Cruz é levado por moita xente aló onde pisa. Un reclamo máis para a nosa vila é Toño Chouza, un crucense que se somerxe no mundo das cámaras e do audiovisual para crear arte. Este veciño leva xa feitas ó pé dunhas trinta curtas ó longo da súa carreira e tamén xa leva gañados algún ca outro premio en Galicia e fóra da nosa terra. No ano 2007 consolidábase co premio Acción cun traballo que fixo na colaboración da súa avoa chamado Somnium. Con esta curta tamén se fixo cun galardón en Madrid.

Pero o seu último lance vaino a dar en certames de Cataluña e Madrid para os que foron seleccionados dous dos seus traballos nun concuro promovido por TVE. Non temos dúbidas que este mozo vai dar moito que falar coas súas curtametraxes en tódolos ámbitos. Aquí xa presentamos unha obra súa na que se plasma a calidade do director representado algo daquí, do noso, e quen mellor para facelo ca un home de Cabo de Cruz.

Fai xa case un ano, por encargo do Concello de Boiro, filmou un documental sobre a Romaría de San Ramón e sinalou: «Deixei que fose a xente a que, a través das súas experiencias, explicara a historia e as particularidades da festa». E que mellor maneira de presentar algo ca coa opinión da mesma xente.

Pero os labores de Toño non se aferran á monotoneidade nin á monotemática, senón que destacan tamén pola sua variabilidade en técnica, temática e argumentos. Atrévese tamén con efectos especiais porque: «Descubrín que ofrecen moitas posibilidades á hora de afrontar a tarefa de escribir un guión, xa que podes incluso crear aos actores». Como vedes, para Chouza non existen as fronteiras detrás dunha cámara.

A súa última obra titúlase: Yo hice un curso de yoga. Un título que mestura ciencia ficción e romance, pero que o autor explica moi ben de qué vai: «A historia xira ao redor dunha parella de descoñecidos que se queda encerrada nun centro comercial de Barcelona cando estala unha chuvia de meteoritos. Quédanlles quince minutos para cumprir os seus obxectivos», sinala.

Pero o obxetivo a acadar por este director de cine é o de grabar unha película, xa que segundo afirma: «Teño claro que este é o meu mundo, no que me sinto cómodo, pero penso que ata que un non roda unha longametraxe non pode considerarse director de cine».  Un home que está enrolado en diversos proxectos e que nestas datas poderédelo atopar por Cabo de Cruz, xa que vén para cumprir varios encargos detrás da cámara e seguir dándolle vida á súa carreira.

En fin, aquí tendes a todo un director que agardemos que nun futuro non moi lonxe chegue moi alto no seu sendeiro ata o máis alto. E queremos tamén ofrecerlle a Toño Chouza este pequeno espazo en Internet para o que precise sempre, xa que para nós é unha honra ter a xente así e que por encima sexa de Cabo de Cruz.

• Noticias relacionadas en: Cultura, Notas de prensa, Novas

Despois de moitos días comentando as novas eleccións da asociación de veciños de Cabo de Cruz, A Unión, queremos informarvos (para os que non o saibades) que segue a mesma directiva que estaba antes. Un equipo case igual, coa excepción de cambio de tesoureiro.

Entre as novas actividades propostas por esta directiva nesta nova etapa de mandato está a de facer unha xuntanza con tódolos veciños de Cabo de Cruz para tratar un tema tan delicado como é o POL (Plan de Ordenación do Litoral) da nosa vila. Estase a preparar de cara as vindeiras xornadas unha rolda informativa para tódolos veciños que queiran asistir á asamblea na que se tratarán as costas de Cabo de Cruz e da parroquia do Castro.

Agárdase a máxima asistencia a tódolos veciños para que non haxa preguntas do tipo: E qué dixeron onte? Sabes algo do que se dixo? E a partires dahí comecen a circular as bolas de neve de mentiras, de «disques» e outras cousas que adoitan pasar pola desinformación da sociedade. Porén, dende CaboDeCruz.Net queremos animarvos a todos e todas a interesarvos polos temas que vos afectan, que nos afectan.

• Noticias relacionadas en: Notas de prensa, Novas, Obras e Proxectos

Coa xa entrada do verán deste 2010, o bo tempo axuda a que moita xente, de fóra e de Cabo de Cruz se anime a achegarse ós areais da zona para tomar o sol ou mesmo botarse ó mar. Por culpa disto, o Concello de Boiro está xa a levar a cabo as tarefas de limpeza das praias a través da contratación dunha empresa que se fará cargo ata o día 7 de xullo.

A praia de Barraña foi o primeiro punto de encontro dos operarios á altura da desembocadura do río Coroño. As vindeiras actuacións serán en: Carragueiros, A Retorta, Mañóns e a Ribeira Grande. A limpeza preseguirá por outras praias menos importantes como poden ser: Triñáns, Ribademar, a  Ladeira, Praia do Porto de Escarabote, Peralto e as calas que hai dende Estivada ata a punta de Neixón.

O 7 de xullo é a data clave na que o concello contratará as cuadrillas de limpeza que o farán ó longo dos meses de verán. Tamén anunciaron que pretenden ter ó pé dunhas vinte persoas encargadas das tarefas de limpeza entre contratados e persoal do concello contratado a través de subvencións da Ditupación e da Xunta.

Tamén se teñen en conta os accesos ás zonas de baño para que estean limpos e transitables coma na Praia do Porto de Ferreiros na zona de Cespón. Trátase dunha pequena cala empregada por algúns veciños que se achegan ó mar dende as súas casas.

• Noticias relacionadas en: Notas de prensa, Novas

Cun par de bronces, o Club de Remo de Cabo de Cruz acadou veuse do Campionato de Galicia de Trainerillas que tivo lugar esta fin de semana en Meira. Para a vindeira fin de semana, dúas embarcacións crucenses estarán en augas de Vilaxoán na cita autonómica.

As valoracións de Mario Vidal, presidente do Club de Remo, foron relacionadas coa menor das trainerillas: «Non digo que fósemos capaces de poder con Robaleira. Pero coido que temos equipo para andar máis cerca. Sacounos 12 segundos, unha enorme distancia, e cedemos tres segundos diante de Vilaxoán, que chegou segundo». Pero as valoracións en categorías meirandes foron boas por parte do presidente: «porque todo foi moi axustado. Estivemos máis cerca de Tirán, que era o gran favorito, do que incluso agardábamos. Ao longo de case toda a regata mantívose a igualdade e só nos metros finais do último logo se decantou a proba», sinalou Mario.

Con respecto ó Campionato de España, Vidal afirmou que o obxetivo «é meterse nas finais do domingo. E teremos que loitar moi duro para acadalo, porque na categoría absoluta veñen clubs tan potentes como Castro, Astillero, Pedreña e Kaiku, con Corta ao mando. En xuvenís, defendemos o título e teremos que facer un esforzo máis grande, para non quedar tan atrás dos rivais».

• Noticias relacionadas en: Clube de Remo, Notas de prensa, Novas

Os axentes do Servizo de Gardacostas da Consellería do Mar tivo traballo estes días tras atopar un total de 576 aparellos de pesca e 339 kilos de peixe e marisco fondeados nas rías galegas. Entre as capturas, moitas delas non daban a talla para a súa extracción e a meirande parte das artes eran ilegais. Entre Cabo de Cruz e a Illa da Arousa atopáronse ó pé de 200 apeiros de pesca que foron incautados polo persoal da Xunta.

O domingo foi o día no que se atoparon un total de: 90 pezas de miños, 95 nasas butrón, 6 tramallos, balizadas antirreglamentarias, 31 kilos de chopo, tres de polbo e medio de nécoras que estaban presos nos aparellos e que segundo explicaron dende a Xunta, as capturas foron devoltas ó mar.

Este foi un dispositivo montado polos axentes da Xunta de Galicia en contra da pesca ilegal nas nosas rías, e como podedes ver, tamén tocou en Cabo de Cruz, onde non nos libramos de nada. Indicamos a tódolos crucenses a que se adapten á legalidade da pesca para non ter sorpresas de multas, redadas e outras cousas. Xa que isto dana consecuentemente a imaxe da nosa vila, xa que se na Confraría hai problemas cos furtivos e logo son os propios crucenses os que incumpren as normas, pois non se fai moito que digamos.

• Noticias relacionadas en: Notas de prensa, Novas

Entre os altercados nas praias, a masiva afluencia de xente por mor do bo tempo e outras cousas, a entidade da Confraría de Pescadores de Cabo de Cruz tivo unha fin de semana moi movida. Saltaba en primeira páxina do telexornal cando se vía a un grupo de mariscadoras e mais ó vicepresidente, tratar de mediar entre uns furtivos que atoparon no areal onde estaban a faenar. Con tan mala sorte que as ameazas verbais pasaron ás mans. Aínda que todo quedou nun susto de mal trago, o malestar mostrado polo grupo de mariscadoras de a pé faise notar estes días na nosa vila. Pero a trifulca parece ser que xa veu dunha semana atrás cando en Peralto houbo enfrontamentos entre furtivos e vixilantes onde o persoal da Confraría tivo que recibir asistencia médica.

Entre todo este fin de semana, foron requisados máis de 300 kilos de marisco que foron extraídos por xente sen permiso das praias onde os vixilantes tiveron un grande traballo. O bo tempo fixo que os bañistas se achegasen ás praias, e algún que outro aproveitou para meter algún berberecho no peto. A raíz disto, a confraría tivo un dobre inimigo: os furtivos por un lado e os bañistas polo outro. Nestes tres días houbo ó pé duns trinta traballadores vixilando o marisco, pero todo esforzo é pouco para preservar o seu medio de vida.

Foron moitos os insultos recibidos polos amigos do alleo que levan o marisco da praia, aínda que tamén hai xente que sen máis tira o marisco ó mar ou devólveo ós vixilantes, segundo afirmaba Carmelo Vidal, o patrón maior. Foron moitos os furtivos que xa van en embarcacións e collen o marisco buceando, asimesmo, utros tentan escapar en canto ven ó persoal da Confraría. Moito traballo o desenvolvido nestes tres días pola entidade marisqueira.

• Noticias relacionadas en: Notas de prensa, Novas