Unha vez máis seguimos coa ausencia da Policía Local de Boiro nun mes clave debido á afluencia de xente e de turismos nas nosas rúas. Parece ser que o problema vai a máis e non se sabe moi ben como rematará a cousa, pois non hai acordo ningún por ámbalas dúas partes (dirixentes e policías).

O caso é que a día de hoxe ninguén pode facer uso das autoridades locais debido ás vacacións, baixas, excedencias, etc. O tema é que tan só hai un axente para cubrir todo o concello de Boiro, e loxicamente, terá que librar nos días que lle correspondan, polo que hoxe será a Garda Civil a encargada de velar pola seguridade dos cidadáns.

A voz de alarma deuse onte cando un veciño se achegou á comisaría para pedir que un axente tratase de retirar un coche que había diante do seu garaxe, pero atopouse co «chiringuito pechado». E como ben engadíu o home: «Non queda máis remedio».

Porén, parece ser que isto vai ter que resolverse por mediación da xustiza, pois os axentes xa teñen contratado a un bufete de avogados para que miren pola súa parte de razón no problema máis actual que teñen. Este problema é que o alcalde de Boiro, Xosé Deira, retiroulle un complemento de productividade a tres axentes; a un deles por «incompetente» e ós outros dous por non asistir a unha reunión co rexidor local cando estaban no seu día libre.

En fin, como todos ben saberedes estamos ante unha situación alarmante cando fai falla a seguridade das nosas autoridades no concello de tamén en Cabo de Cruz. Agardamos que todo isto se resolva no menor tempo posible e que ámbalas dúas partes cheguen a un acordo que sexa o mellor para a cidadanía.

• Noticias relacionadas en: Notas de prensa, Novas

Escribo isto aquí porque estou totalmente indignado cun deporte que sigo dende fai bastante tempo e isto fágoo dende a miña posición de espectador e non de administrador. Trátase da fórmula un. Todos sabemos que este é un deporte onde se moven moitos millóns de euros, existen moitos intereses tras cada pequeno xesto e sempre pode haber unha man negra detrás de todo. Pero a pinga que colmou o vaso foi neste pasado Gran Premio de Europa na cidade de Valencia.

Todos os que seguimos este deporte día a día, sabemos quen é Lewis Hamilton: un trampulleiro. Todos acordamos como nun grande premio con chuvia, onde se saíron da pista uns catro ou cinco coches, de súpeto sae unha grúa que o pon na pista a el só. Todos acordamos a etapa cando Fernando Alonso, bicampión mundial, comparteu escudería co inglés tivo un trato moi diferente ó del. Todos acordamos cando tras unha carreira, e logo do envío dun vídeo dun afeccionado, a dirección de carreira tivo que sancionar a este piloto. Todos acordamos un Gran Premio de Brasil cando por arte de maxia o piloto Timo Glock perde 30 segundos nunha volta para que gañe o mundial Hamilton, etc. En fin, e podería seguir así ata aburrir do feixe de trampas e sospeitas que se lle permiten a este piloto ó longo da súa etapa na F1.

Pero a deste domingo foi máis alá. Sitúovos: accidente espectacular de Mark Webber no que podería perder a vida facilmente debido ó golpe levado. Non se sabe como sae o coche de seguridade ou safety car e detrás del o coche médico ou medical car para atender ó piloto de Red Bull. Pero isto todo está dirixido por un monigote chamado Charlie Whiting que mete ó coche de seguridade detrás de Sebastian Vettel (cabeza de carreira) e diante de Lewis. Como todo piloto sabe, ó safety car non o pode adiantar ninguén excepto o fillo pródigo: Lewis Hamilton, cousa que fixo en contra da normativa.

Pero non foi así cando Alonso cumpriu as normas perdendo uns cinco ou seis postos deixando pasar a tal coche. Pois ben, o que fai a dirección de carreira é despois de deixar pasar ó pé de 20 voltas e darlle tempo ó inglés a gañar metros entre o seu predecesor, mételle un Drive Through que non lle afecta en nada ó piloto de McLaren. Pero si ó resto de pilotos que lles meteron cinco segundos trala carreira e non en tempo de voltas como deberían. Este feito pode decidir claramente un campión do mundo, que todo apunta a que este ano será o inglés de McLaren, xa que aquí o que ten padriño bautiza e o que non queda sen nada.

Isto indica que o sinal de televisión está controlado por Bernie Ecclestone, ou sexa que todos vemos o que el quer que vexamos, e logo o señor Whiting decide el mesmo as normas, xa que neste deporte non existen. Ou mellor dito fanse despois de que Hamilton as incumple (caso dunha inmerecida Pole Position en Canadá por quedar sen combustible). E quero chegar ó punto de que todos estes infractores son ingleses que se cubren as costas entre sí e que barren sempre para a casa emporcando a imaxe da F1 en todo o mundo.

Obviamente tódolos xornais do mundo excepto os ingleses, poñen a estes personaxes coma uns tramposos e uns falsos que están facendo deste emocionante deporte, algo digno de apagar a televisión.Dende aquí e dende a Asociación do motor do Barbanza queremos mandarlle ánimo ós pilotos españois: Fernando Alonso, Pedro Martinez De La Rosa e Jaime Algersuari. Ánimo!

• Noticias relacionadas en: Notas de prensa, Novas

Hai cousas que non se saben, e outras moitas que quedar por saber, pero dun xeito ou doutro chegounos ós oídos a habilidade dun mozo de Cabo de Cruz, concretamente da Aldea de Arriba, que desborda arte por tódolos costados. O seu nome é Pablo Lado e actualmente atópase cursando o Bacharel no IES Praia Barraña, pero xa apunta maneiras dende fai tempo. Iso nótase nos premios conseguidos en diversos concursos de debuxo e outras técnicas empregadas polo crucense. Hai que falar tamén dun concurso da Diputación de Lugo onde acadou o primeiro premio, entre outros moitos galóns.

Son numerosas as obras deste artista que ten no seu legado sen chegar á maioría de idade, pero deunos luz verde para mostrarvos un curto que fixo el do seu puño e letra. A obra chámase «O gato con fame» e está feita totalmente á man cunha técnica depurada e elaborada por Lado. Aquí tendes unha mostra do seu bo saber:

Como podedes observar foi un pequeno traballo para a escola no que o autor puxo moito empeño e sacou o que vedes, nin máis nin menos ca unha pequena historia dun gato que fai o imposible para acadar unha pouca comida. En CaboDeCruz.Net non somos moi expertos na materia, pero soubemos valorar este traballo. E que ben fai este home lucindo traballos da terra que nos dan un forte impulso coma o «Íscalle lura» dos Heredeiros da Crus para a banda sonora, en vez de coller música de fóra como podía ter feito.

Xa puxemos aquí algunha que outra obra que naceu en mans de xente de Cabo de Cruz, e isto indica que temos madeira para o que faga falta, Agardamos que Pablo nos ceda algún dos seus traballos: debuxos, esculturas, curtos, etc. xa que o que queremos é promocionar dalgún xeito a esta xente que ten moito que ofrecernos a todos. Por iso, Pablo, queremos felicitarche polo teu traballo e que sigas así de por sempre, xa que aquí tes un espazo na Internet para o que ti dispoñas.

Ánimo Artista!

• Noticias relacionadas en: Cultura, Novas, Videos

Xa son moitas as novas de diversos xornais da comarca que nos mostran o que acontece cada noite de movida en Boiro e os cidadáns comezan a estar un pouco fartos. Nesta fin de semana, entre outras cousas, houbo unha denuncia a unha pandilla de mozos que entraron nun local rompendo cousas para lle pegar a outro que escapaba deles. Esta era a nova que tiñamos por exemplo, na Voz de Galicia.

Pero a cousa non queda só ahí. Un sábado pódense ver auténticas barbaridades, faltas de educación e respecto e moitas outras cousas máis. O que máis sofre, se cadra é o mobiliario urbán coa ruptura de sinais de tráfico, macetas, árbores, coches raiados, etc. Isto tamén se dou este sábado na rotonda da movida onde había tirado unha árbore arrancada de raíz e un sinal de tráfico enriba da acera.

Dende o concello indican que non é para tanto a cousa e que a seguridade se ve respaldada coa presencia da Garda Civil e da case nula presencia da Policía Local por falta de efectivos. Pero asegúrolles ós mandatarios de que coa cantidade de xente que hai en Boiro e co vandalismo que se produce nas noites de movida, non hai moito que facer en canto a efectivos policiais.

Porén, as medidas para que isto non pase teñen que ir por outro lado, se cadra máis á concienciación da xente e á aplicación dunha lei máis dura que faga pensar antes de romper algo. Con todo isto, quen as vai pagar van ser os hosteleiros que verán mermados os ingresos o día en que a xente se canse de tantos problemas e se vaian a outro sitio.

• Noticias relacionadas en: Notas de prensa, Novas

Despois dunha morea de queixas postas na entidade do Sergas, os veciños de Cabo de Cruz seguimos na mesma este novo verán. Trátase de que nos quedamos sen doutor no seu merecido mes de vacacións e o Servizo Galego de Saúde fai oídos xordos ante as queixas dos cidadáns. Pero Manuel Dominguez, o presidente do Club de Xubilados de Cabo de Cruz fai un retrato case perfecto da situación ante tal indignación: «Están discriminando a Cabo de Cruz, queren acabar cos poucos servizos que temos aquí», indica o presidente.

Namentres que da cadras das súas palabras, indícanos na placa da Casa do Mar que o edificio pertence ó Estado español, concretamente ó Ministerio de Traballo. Isto é porque xa son moitas as cousas que molestan no seo da terceira idade crucense como afirma este home: «Mira, deste sitio acaban de botar á asociación A Unión, que non lle facía mal a ninguén, e como a xente non se mova Cabo de Cruz acabará quedando sen servizos para sempre, iso hase de ver. ¿Non se dá conta a xente de que aquí non queren deixar nada, que queren que morra este edificio?».

De súpeto, comeza coa busca de culpables sobor de todo no asunto do médico, aínda que tamén critica que o novo Centro Social non estea situado na Casa do Mar, xa que como Dominguez di, se as instalacións estivesen coidadas outro galo cantaría. «Eu véxoo moi claro, o Concello non se preocupou por nada, quixo facer o centro social noutro lado e pouco a pouco aquí, onda o peirao, onde está a vida de Cabo, quedamos sen nada. ¿Por que noutros sitios poñen substitutos para os médicos e aquí non? Eu creo que é porque o Concello non insiste o suficiente».

Logo, as queixas son para a desfeita do Sergas na nosa vila: «Hai persoas maiores que non teñen quen as leve a Boiro; aos que mandan iso non lle importa, pero é así» e remata dicindo que: «Hai que protestar, a xente da Unión xa o fixo e aos xubilados tampouco nos gusta que nos quiten o médico así como así».

• Noticias relacionadas en: Foto Denuncia, Notas de prensa, Novas

No día de onte houbo unha xuntanza entre os técnicos de Portos de Galicia, as entidades de Cabo de Cruz e mais os rexedores locais, alcalde e tenente alcalde. Na reunión tratáronse varias cousas, pero a principal foi o pequeno retraso que parecen levar as obras do porto debido a varios obstáculos que xurdiron tralo plantexamento dos prazos estimados.

As explicacións de Deira e de Ares foron que a ampliación da escollera tiña que dar remate nestes vindeiros meses de xullo e agosto, pero iso non será posible ata polo menos o mes de outubro según as explicacións dos técnicos. Pero aínda así a xente saíu convencida de dita reunión, xa que se explicaron punto por punto os pasos que levamos dados e os que se darán desta obra.

Sigue leyendo… »

• Noticias relacionadas en: Notas de prensa, Novas, Obras e Proxectos

O nome de Cabo de Cruz é levado por moita xente aló onde pisa. Un reclamo máis para a nosa vila é Toño Chouza, un crucense que se somerxe no mundo das cámaras e do audiovisual para crear arte. Este veciño leva xa feitas ó pé dunhas trinta curtas ó longo da súa carreira e tamén xa leva gañados algún ca outro premio en Galicia e fóra da nosa terra. No ano 2007 consolidábase co premio Acción cun traballo que fixo na colaboración da súa avoa chamado Somnium. Con esta curta tamén se fixo cun galardón en Madrid.

Pero o seu último lance vaino a dar en certames de Cataluña e Madrid para os que foron seleccionados dous dos seus traballos nun concuro promovido por TVE. Non temos dúbidas que este mozo vai dar moito que falar coas súas curtametraxes en tódolos ámbitos. Aquí xa presentamos unha obra súa na que se plasma a calidade do director representado algo daquí, do noso, e quen mellor para facelo ca un home de Cabo de Cruz.

Fai xa case un ano, por encargo do Concello de Boiro, filmou un documental sobre a Romaría de San Ramón e sinalou: «Deixei que fose a xente a que, a través das súas experiencias, explicara a historia e as particularidades da festa». E que mellor maneira de presentar algo ca coa opinión da mesma xente.

Pero os labores de Toño non se aferran á monotoneidade nin á monotemática, senón que destacan tamén pola sua variabilidade en técnica, temática e argumentos. Atrévese tamén con efectos especiais porque: «Descubrín que ofrecen moitas posibilidades á hora de afrontar a tarefa de escribir un guión, xa que podes incluso crear aos actores». Como vedes, para Chouza non existen as fronteiras detrás dunha cámara.

A súa última obra titúlase: Yo hice un curso de yoga. Un título que mestura ciencia ficción e romance, pero que o autor explica moi ben de qué vai: «A historia xira ao redor dunha parella de descoñecidos que se queda encerrada nun centro comercial de Barcelona cando estala unha chuvia de meteoritos. Quédanlles quince minutos para cumprir os seus obxectivos», sinala.

Pero o obxetivo a acadar por este director de cine é o de grabar unha película, xa que segundo afirma: «Teño claro que este é o meu mundo, no que me sinto cómodo, pero penso que ata que un non roda unha longametraxe non pode considerarse director de cine».  Un home que está enrolado en diversos proxectos e que nestas datas poderédelo atopar por Cabo de Cruz, xa que vén para cumprir varios encargos detrás da cámara e seguir dándolle vida á súa carreira.

En fin, aquí tendes a todo un director que agardemos que nun futuro non moi lonxe chegue moi alto no seu sendeiro ata o máis alto. E queremos tamén ofrecerlle a Toño Chouza este pequeno espazo en Internet para o que precise sempre, xa que para nós é unha honra ter a xente así e que por encima sexa de Cabo de Cruz.

• Noticias relacionadas en: Cultura, Notas de prensa, Novas

Tarde agradable de sol que cubría o estadio de Valiño cando se enfrontaron os dous equipos da bisbarra do Barbanza polos cuartos de final da Copa do Sar. Foi un encontro do máis igualado durante todo o tempo, pero finalmente a victoria caeu para os da Pobra por un resultado de 1 -2.

Despois dos primeiros cinco minutos xa se podía observar que o campo estaba fatal para a práctica do fútbol, pois os botes do balón eran demasiado imprecisos para un clube que ascende á 2ª autonómica. Pero isto era así para os dous equipos enfrontados.

A primeira clara ocasión foi para o Pobra a través dun penalti un tanto dubidoso pitado polo linier. Pero o que non sabía Cheché era que Cristian xa sabía por onde ía ir o esférico. Tras aguantar ben o lanzamento do dianteiro, o cancerbeiro fixo unha estirada para botar o balón a córner e salvar o que podía ser o primeiro gol do Puebla.

Uns intres despois, a maxia de Babaká desbordou a banda cuns regates en velocidade e bateu por debaixo ó porteiro visitante nunha definición maxestuosa do xogador estranxeiro. Isto poñía o 1 – 0 no marcador, pero o partido seguía na mesma dinámica de igualdade e os pobrenses non se deron por perdidos nin moito menos. Chegábase así ó descanso.

Pero o equipo visitante saíu moi concienciado para esta segunda metade na que tras un fallo da defensa por mor de deixar ó dianteiro en fóra de xogo, provocou unha saída e despexe de Cristian que foi aproveitado polo dianteiro para marcar case a portería baleira. Isto poñía as condicións moi igualadas para ambolos dous escadróns co 1 – 1.

A medida que ía pasando o tempo o Cabo de Cruz ía pagando a factura da forma física polo que Juancho tivo que botar man do banquiño facendo os cambios: Nolo por Óscar, Chiqui por Romero no minuto 70 de partido e cinco minutos máis tarde deulle entrada a Siti por Toño (alegando unha doenza). Pero o partido non ía quedar así, xa que nun asedio á defensa do equipo local, os da Pobra lograron adiantarse no marcador a través dunha boa xogada que lles deu a victoria final.

Os crucenses afirman que a eliminatoria aínda non está pechada nin moito menos, xa que un resultado cunha diferencia dun gol é case totalmente un partido aberto para os dous equipos e aseguran que no Campo da Alta van a ir a por todas sen dúbida algunha.

Agardamos que sexa así e que o equipo da nosa vila acade ese valioso pase a semifinais para estar máis preto do título da Copa do Sar.

• Noticias relacionadas en: Fútbol Cabo da Cruz, Novas

Despois de moitos días comentando as novas eleccións da asociación de veciños de Cabo de Cruz, A Unión, queremos informarvos (para os que non o saibades) que segue a mesma directiva que estaba antes. Un equipo case igual, coa excepción de cambio de tesoureiro.

Entre as novas actividades propostas por esta directiva nesta nova etapa de mandato está a de facer unha xuntanza con tódolos veciños de Cabo de Cruz para tratar un tema tan delicado como é o POL (Plan de Ordenación do Litoral) da nosa vila. Estase a preparar de cara as vindeiras xornadas unha rolda informativa para tódolos veciños que queiran asistir á asamblea na que se tratarán as costas de Cabo de Cruz e da parroquia do Castro.

Agárdase a máxima asistencia a tódolos veciños para que non haxa preguntas do tipo: E qué dixeron onte? Sabes algo do que se dixo? E a partires dahí comecen a circular as bolas de neve de mentiras, de «disques» e outras cousas que adoitan pasar pola desinformación da sociedade. Porén, dende CaboDeCruz.Net queremos animarvos a todos e todas a interesarvos polos temas que vos afectan, que nos afectan.

• Noticias relacionadas en: Notas de prensa, Novas, Obras e Proxectos

En artigos anteriores vimos como accións de varios veciños de Cabo de Cruz perxudicaban a outros e son accións que cun pouco de coidado se poden evitar. Para isto, tamén temos un pequeno video dun incumprimento da normativa, xa que isto recólleo a lei e mesmo o ensinan cando se quita  a teoría do carnet de coche. Imos ver o video:

Como podedes ver neste pequeno video, o veciño limpa o seu motor despois de vir do mar. Isto provoca que se deixe na rúa todo o lixo, graxa e salitre que poida traer este motor do mar. Aparte de todo isto podemos escoitar o ruído que causa nunha vía pública (que isto sería o menor dos males, pero todo hai que telo en conta). Como todos deberíades saber, non está permitido lavar nada na rúa pública, e cando digo nada refírome a coches, motores e outras cousas que poidan enlixar algo público, non da nosa casa. Se alguén quer lavar o coche debe facelo na súa propiedade e sen botar a auga ó camiño. E isto non o digo eu porque sí, senón que se recolle nunhas normas e leis.

Con estas mostras agardamos que todo veciño e veciña tome nota disto e se conciencie de que o que non quer para si mesmo, que non llo faga ós demais. Para máis agora que temos unhas rúas empedradas que moito costou conseguir e que lle dan un toque decente e bonito á nosa vila, e non o imos estragar con estas pequenas cousas que se poden amañar civilizadamente.

• Noticias relacionadas en: Foto Denuncia, Novas, Videos