Trala reunión deste pasado sábado, onde se ían explicar entre outras cousas como estaba o tema da reordenación do tráfico no núcleo urbán do Cabo da Cruz, parece que se chega a un fin próximo segundo relatan dende o concello de Boiro. O presidente da Unión, Benigno Sánchez cifra duns quince días o prazo que ten o concello para comezar unhas obras que xa levan catro anos no arquivo do concello. Onte, o primeiro tenente alcalde, Ares, sinalou que os traballos comezarán de contado, aínda que non se atreveu a dar prazos concretos.

Como xa se explicou anteriormente, a actuación conleva a algo moi sinxelo como é colocar uns sinais novos para que en zonas estreitas como son Bandaorrío ou a Pesqueira se poida circular sen ter a pescuda de atopar un vehículo de frente. Porén o sentido do tráfico, a partires de que se execute a obra, será nun único sentido. Agárdase que o retraso considerable destas obras remate canto antes, xa que a obra é mínima e pode facerse en cuestión dun par de días como moito.

Tamén se calcula que este novo mini-proxecto de obra afecte a un total duns cinco centos veciños do Cabo da Cruz, polo que o beneficio da obra para a nosa vila será considerable para o noso desenvolvemento. Agardamos comprensión nestes primeiros días de adaptación á sinalización, xa que este cambio pode desorientarnos un pouco debido ó costume de saír ou entrar sempre polo mesmo lado.

• Noticias relacionadas en: Notas de prensa, Novas, Obras e Proxectos

Pasando polo seo da asociación de veciños o outro día, vin que tiñan alí colgada unha carta ós Reis Magos do concello de Boiro. Nela pedíase algo moi sinxelo, que non conleva nin sequera moito gasto. Algo necesario por se tratar da protección dos nosos cativos. Pedíase unha marquesina.

O motivo é que os rapaces do Corviño non teñen onde abrigarse cando agardan polo autobús escolar. Para máis nestes tempos de choivas e friaxes onde os pequechos teñen que estar ahí ás duras e ás maduras. Non ten moito xeito que a estas datas de curso aínda non haxa dúas táboas e catro puntas para facer unha marquesina para os rapaces do Corviño.

Segundo a Unión, as contínuas suxerencias ó concello de Boiro por mor desta carencia foron contínuas, e dende o concello moi amablemente dixeron que sen falla o ían facer. Quedouse cunha persoa da Unión para que lles indicase a ubicación da infraestructura. Quedouse para o xoves desta semana, sen falla, pero lamentablemente era xa no venres cando aínda estaban á espera de dita chamada para proceder coa posta do lugar de abrigo.

Agardamos dende CaboDeCruz.Net e dende a vila do Cabo da Cruz que o concello nos bote unha mira algo máis intensa para paliar os contínuos problemas que ós que temos que darlle solución na nosa vila. Pois o da marquesina é algo tan primordial que non se pode deixar para máis tarde, pois os nosos cativos teñen escola xa mañá e aínda non teñen onde resgardarse da choiva e do frío.

Pedimos ó concello actuacións inmediatas neste tipo de temas e en outros moitos máis que a nosa asociación de veciños A Unión pediu por nós. Consideren vostedes, os do concello, que somos un núcleo urbano fundamental e tamén un motor da economía clave no desenvolvemento de Boiro. Porén pídese un trato máis activo e atento, que non se dí que o de agora sexa malo, pero como en todo, todos podemos mellorar un pouquiño máis se cadra.

• Noticias relacionadas en: Novas, Obras e Proxectos

Xa fai tempo que a reordenación do tráfico do Cabo da  Cruz é un tema a tratar entre veciños, asociación de veciños e concello. A Unión reclama que este plan pase do papel impreso á execución real nos viales que forman o Cabo da Cruz, pois era un tema esquecido que a nosa asociación quer sacar á luz novamente dado o seu esquecemento.

O presidente, Benigno Sánchez, sinala que este tema xa foi posto en coñecemento do concello fai uns catro anos, e en zonas como a Pesqueira e Bandaorrío son as execucións que máis présa corren. Pese á conformidade do concello, este tema segue a ser un tema pendurado da lámpada que nunca acende, pois a espera é ben longa.

O que se pretende facer é establecer o tráfico en sentido único en moitas rúas do núcleo da vila que debido a que son moi estreitas, as manobras dos coches son frecuentes na circulación do tráfico. Comeza a producirse un certo malestar no seo crucense, pois este plan xa fai máis dun ano que se aprobou e segue á espera da súa execución. Pese a isto, tamén sinalar que mesmo a Deputación subvencionou á Unión con 6.000 € para a dotación da regulación do tráfico e para que se poidan executar así as obras correspondentes.

Este tema tamén se tratará na reunión de hoxe día 9 pola tarde que terá lugar no local da AMC, como se explicou xa nun artigo de CaboDeCruz.Net.

• Noticias relacionadas en: Notas de prensa, Novas, Obras e Proxectos

Polo visto o tema dos pasos elevados seguen traendo polémica ó Cabo da Cruz cando onte os obreiros estaban retirando un paso xa construido ó carón dun dos accesos á praia de Barraña. Dende o concello a resposta foi por parte do tenente alcalde, Juan Jesús Ares, que indicou a aparición dun erro no proxecto, polo cal houbo que destruir un paso.

Ares recoñeceu que a posta dos pasos está traendo consigo unha grande polémica e un quebradeiro de cabeza para o concello de Boiro, palabras distintas ás do alcalde nunha intervención anterior, cando afirmaba que isto tiña próxima a súa fin. Trala falta de entendemento neste proxecto, dende o concello afirman que onte houbo unha solicitude para poñer un paso elevado por parte dun particular, por iso que é complicado establecer un punto en común entre todos.

Agora, as pesquisas do asunto levan a que tan só serán catro ou cinco os pasos que poidan plantar na carretera que une o Cabo da Cruz con Boiro, pois a presión veciñal faise notar, e o desbaraxuste total por parte do concello conleva a dirixir a situación a algo coherente, pois se antes eran doce pasos, despois seis, agora catro ou cinco… Ata ónde se quer chegar?

Dende o Cabo da Cruz agárdase que os nosos dirixentes saiban resovler a situación e facer as cousas escoitando a voz do pobo para quen gobernan, pois os que estamos a sufrir as consecuencias somos os que cada día que queremos ir a Boiro temos que dar toda unha volta e agardar semáforos por culpa destas obras que non parece que vaian rematar daquí a pouco.

• Noticias relacionadas en: Notas de prensa, Novas, Obras e Proxectos

E isto sigue con máis masa para facela parede. Dos doce badéns plantexados nun principio de obra, agora o concello de Boiro reduce a tan só catro pasos elevados á altura da acera, e os outros oito irán case ó ras do chan como está o que hai nos semáforos da entrada de Boiro, en frente á farmacia. O alcalde Xosé Deira insta a que isto xa vai estar de contado solucionado chegando así á recta final da discordia.

En resposta ás firmas recollidas pola Plataforma veciñal, o alcalde sinala que xa reduciron o número a seis badéns altos, e agora a catro. Os catro badéns altos estarán situados no centro de saúde , no pabillón de barraña (en construcción) e no centro social do Cabo da Cruz . Un cuarto badén iría á altura de Xión ou en Cariño.

O tenente alcalde Juan Jesús Ares móstrase dialogante afirmando que se vai aproveitar a reunión do seguimento das obras do novo muelle para falar cos colectivos do Cabo da Cruz sobre o tema dos badéns. O líder do PSOE de Boiro comentou que non se quer impor nada e que a fin desta polémica é chegar a un consenso entre os veciños e o concello.

Pola outra banda, a Plataforma para a Defensa dos Intereses de Cabo de Cruz mostraron o seu contento pola mostra de diálogo que ofrece o concello de Boiro e para así poder facer as cousas ó gusto da maioría, ainda que sempre haxa discrepancias en cousas deste tipo.

• Noticias relacionadas en: Notas de prensa, Novas, Obras e Proxectos

O outro día era habitual ver nos establecementos do Cabo da Cruz unhas follas cun texto en contra da colocación dos pasos elevados que se están a poñer na estrada que une a nosa vila do Cabo da Cruz co núcleo boirense. Eran tamén moitos os veciños que se achegaban a firmar en contra do que o concello de Boiro coa axuda da Diputación está a facer en dito vial. A Plataforma da Defensa dos Intereses do Cabo da Cruz acadou as 600 firmas dos dous mil e pico habitantes que temos no Cabo. Agárdase que a cifra supere en breve ó milleiro de persoas en contra desta nova obra.

Os puntos que sinala a Plataforma para esta rexeita da obra son:

1. Os traslados en ambulancia de feridos nos que van a ir coma nas barquillitas das Festas do Carmen, entre outros vehículos coma poden ser os bombeiros ou a Garda Civil.

2. O marisco do que moita xente vive corre o risco de romper nestes pasos elevados cos saltos que pegue o transporte do producto.

3. O pobo deberá facer un esforzo adicional para saír da nosa vila e dirixirnos mesmo ós puntos de traballo.

Outro reflexo importante destas queixas é o novo porto deportivo que traerá a moitísima xente que queira ter as súas embarcacións amarradas ó muelle do Cabo da Cruz, pero que con estes pasos veranse obrigados a pasar con moitísima precaución, ou ben a irse a outro muelle onde teñan uns accesos menos obstaculizados.

Sen embargo a negativa da Plataforma non é total, pois acceden a que se poñan en puntos como pode ser o novo centro social, o pabillón de barraña e no ambulatorio, lugares onde o tránsito de xente é considerable e ahí si que poden facer falta este tipo de medidas.

Os veciños voltan a expresar o mesmo que anteriormente. Con esta medida perxudícase a toda unha vila, mentas que con outras medidas alternativas actúase onde se debe, máis ca cazando ós infractores de dito vial polos que agora se monta esta nova situación na nosa vila. Hai medidas coma a posta de radares ou incrementar a vixilancia policial que serían máis axeitadas ó problema que acontece.

Polo de agora, as obra seguen o seu curso e non se ven afectadas de ningún xeito, polo que agardamos que tanto o concello de Boiro coma os veciños do Cabo da Cruz cheguen a un punto en común para acometer este proxecto.

• Noticias relacionadas en: Notas de prensa, Novas, Obras e Proxectos

Dende o comezo das obras dos pasos elevados que se van poñer na estrada que une a nosa vila con Boiro, as queixas e críticas por algunha xente estaban garantidas. Se antes se dicía que eran demasiados, agora os empresarios boirenses sinalan que non existe unha licencia da Diputación para facer as obras.

Son moitas as persoas que discrepan que estes pasos vaian a ser a disolución da inseguridade no vial, e din que o único que vai a provocar esta acometida obra é perxudicar ó sector empresarial e ós propios veciños do Cabo da Cruz.

Os puntos de apoio do concello son a excesiva velocidade dalgúns conductores no vial limitado a 50 km/h, as numerosas interseccións e o elevado tránsito peonil e de vehículos que frecuenta esa carretera a diario. Na mentres a opinión dos veciños é que hai outros xeitos de millorar a seguridade vial, e porque uns non cumprar as normas, non temos por qué pagar todos os seus problemas.

Por parte do concello, o edil de urbanismo Xoán León, sinalou que o persoal da Diputación visitou a zona e revisou o proxecto que se está a levar a cabo, dándolle así o visto bo á obra.

• Noticias relacionadas en: Notas de prensa, Novas, Obras e Proxectos

Como se comezou con esta nova, a nosa misión é rematala, e non podía ser do millor xeito ca este: a paralización das obras e da destrucción do patrimonio histórico da cidade de Murcia. Unha vez máis vemos como a mobilización dos cidadáns derrotou finalmente as expectativas do concello de destruir a súa historia. Foron tamén arroupados por arqueólogos e historiadores os que finalmente entre todos botaron abaixo o macabro plan do parking nese lugar.

Como podemos ver, unha orde xudicial foi a causante da paralización das obras, co cal agora o pobo murciano pode estar tranquilo, pois a súa historia vai a pasar ás mans dos arqueólogos que tratarán de sacar a máxima información sobre este descubrimento que pode mostrar claramente a vida da cidade nos séculos XII e XIII.

Finalmente agardemos que non se lle dean máis voltas ó tema e que non teña que haber ningún tipo de orde xudicial para poder conservar a nosa historia. Agardamos tamén que os políticos tomen nota de que non todo é como eles queren, e que cando son elexidos é para gobernar un pobo e xestionar do mellor xeito tódolos seus recursos. Os murcianos son tamén agora un claro exemplo de contundencia social ante as inxustizas por calquera motivo que se nos poden presentar na vida. Isto ten un encubrimento para aprender: xuntos podemos!

• Noticias relacionadas en: Notas de prensa, Novas, Obras e Proxectos

Isto xa tiña que ser o pasado 25 de novembro, pero ó parecer o enxeñeiro que leva a obra non puido asistir ese día polo que se acordou o seu aprazamento ata o vindeiro mércores. Así poden ser revisadas as obras do novo porto do Cabo da Cruz que xa levan tempo en execución, e tras varias protestas dos crucenses debidas a conflictos anteriores decidiuse facer este tipo de seguimentos periódicos.

Son tamén varios os veciños do Cabo da Cruz que senten que algo non marcha debido ó aprazamento da xuntanza tralo desenvolvemento das obras, pero dende o executivo local de Boiro desminten estas posibles sospeitas.

Un dos temas a tratar entre outros serán as molestias que as obras están causando na nosa vila e o constante paso dos camións de grande tonelaxe e á velocidade que ían polo que xa se puxeron varias denuncias ó respecto por parte dos veciños e entidades locais.

Agardemos que estas xuntanzas non se apracen de cotío, pois un proxecto desta embergadura merece a revisión constante de persoal cualificado para que a obra siga o seu rumbo segundo o previsto nos planos e acordos anteriores á súa execución.

• Noticias relacionadas en: Notas de prensa, Novas, Obras e Proxectos

Cando se planificou a intención do concello de instalar uns pasos elevados nos pasos de peóns que unen a carretera do Cabo da Cruz ata Boiro, houbo polémicas e diversas opinións sobre si eran moitos os dazaoito que se tiñan previsto para un principio. Porén, agora a decisión final do departamento de urbanismo do concello de Boiro é aportar tan só unha ducia de pasos, dos que non todos estarán no vial que nos pode afectar ós crucenses para chegar ó nucleo urbano, que serán nada máis ca seis.

Polo momento, xa temos tres construidos, que están: un no ambulatorio, outro nos semáforos da entrada a Boiro e outro en frente do novo centro social do Cabo da Cruz. Foron postos deste xeito, porque a interrupción do tráfico era menor nestes puntos estratéxicos, pero de agora en diante as novas obras faranse a través dun semáforo de obra para ter o menor impacto no tráfico rodado.

O paso que está en frente do polideportivo de Barraña será a vindeira obra a acometer deste tipo, e tamén outro paso que está próximo ó polideportivo terá a súa intervención en breve. Isto faise máis que nada para favorecer cousas coma que se atropelen menos xente nos pasos de cebra, para reducir as velocidades excesivas no vial e tamén para que a xente con cadeiras de rodas ou carros non teña que facer un esforzo excesivo á hora de cruzar a rúa tendo que baixar ou aceras.

• Noticias relacionadas en: Notas de prensa, Novas, Obras e Proxectos