Tranquilos todos que non é no Cabo da Cruz, pois aquí temos un pouco máis de civismo á hora de facer cousas coma a seguinte. Todo ocorreu no estado de New York, condado de Queens dos Estados Unidos, cando unha nena de 12 anos estaba na aula agardando pola mestra e ocorréuselle escribir na súa mesa o seguinte: «Quiero a mis amigas Abby y Faith», «Lex estuvo aquí. 2/1/10», e logo debuxou unha cariña feliz . Entón, tan só por iso a nena saíu da escola esposada polos axentes da autoridade e foi transladada de inmediato á comisaría máis próxima.

Isto deixa moito que desexar da maior potencia mundial, xa que cousas coma esta fannos ver o ridículos que poden chegar a ser nos EE.UU. A nena, cando lle chamaron á atención polos feitos, pensou que tan só o tería que limpar, cousa normal que che manden facer, e como moitos fixemos algún día pintando nas mesas do colexio de Valiño, no instituto de Boiro ou mesmo na universidade. Aclarar que cando xa estás no instituto ou estudos superiores, a escrita das mesas pode ser polo mestre que fai durmir ata ás moscas.

E voltando á nosa pequena ianqui, dicir que a parte de todo isto impuxéronselle oito horas de traballo comunitario, a parte dun ensaio do que aprendeu para a próxima vez. Todo un poema de falta de sentido común. E agora é cando se vos pode pasar pola cachola: «Se isto llo fan a unha cativa de doce anos ianqui, ¿Qué lle facerán ós presos de Guantánamo?»…

Dicir tamén que unha vez pasados os feitos, dende o Departamento de Educación indicaron que todo foi un erro, e dende a policía dixeron que están autorizados a facer detencións, pero aplicando así o sentido común.

A Unión de Liberdades Civiles de New York presentou o mes pasado unha demanda en contra da Policía por máis de vinte detencións pola forza a menores de idade.

• Noticias relacionadas en: Curiosidades, Notas de prensa, Novas

Esta noite pasada foi unha noite chea de ledicia e ilusión para os nosos cativos, e os non tan cativos, pois a presencia deses seres máxicos que fan unha longa viaxe, foron a causa desta data: 6 de Xaneiro. Data na que a estas horas moitos dos cativos do Cabo da Cruz están cos ollos espetados nos regalos que os Reis Magos lles trouxeron polo seu bo comportamento. Onte pola noite, chegando de camiño á miña casa atopei cos Reis Magos por pura casualidade, pois estaban repartindo os agasallos polo Cabo da Cruz.

Vin a Melchor, a primeira vez que vía algo semellante, pois o dispositivo entre reis, paxes e camellos era impresionante. Díxome Melchor que este ano os nenos do Cabo da Cruz portáronse bastante ben, motivo polo que van ter uns bos regalos. Pero este ano, se cadra non van a traer tantos porque un dos camellos caeu enfermo ó pouco de partir de Oriente e teñen que vir algo máis descargados para que o animal non sufra. Os maiores a isto chámanlle crise, pero non é certo. Pequenos, pequenas do Cabo da Cruz, dende CaboDeCruz.Net queremos transmitirvos as palabras das maxestades e dixeron que os regalos deste ano van a ser uns regalos traídos con moita ilusión e cariño para todos vós. Porén debedes facer un esforzo de conformismo de cara este Nadal para que os Reis vexan en vós comprensión e que para o ano ese camello non enferme e poida vir máis cargado ca este ano.

O rei Melchor pediume expresamente que vos dixese que o comportamento de todos vós, neste 2009, foi do mellor, e que agarda que neste ano 2010 sexa así ou máis bo. Este rei agarda moito de vós: que lles fagades caso ós vosos maiores, que estudedes moito, que axudedes na casa e que o pasedes moi ben. En fin, este día sen dúbida que é o voso día, non esquezades ir á casa dos avós, dos padriños, dos tíos e dos amigos, pois nunca se sabe onde os Reis Magos puideron deixar algo no voso nome.

De parte das maxestades de Oriente e da administración de CaboDeCruz.Net desexámosvos un moi feliz 2010 que veña cheo de traballo, de ilusión, de desexos cumpridos e de todo o mellor para os máis cativos e non tan cativos. Agardamos que disfrutedes moito dos agasallos para que o vindeiro ano sexan máis e mellores.

Un cordial saúdo: Os Reis Magos de Oriente

• Noticias relacionadas en: Cultura, Curiosidades, Novas

Sorprendente o título deste artigo? Pois non, penso que todo o contrario vendo o que acabo de ver no portal de videos de Google, Youtube. Como anda tan pendente este tema do noso idioma galego, que si decreto si, que si decreto non, que si os pais escollen, que si o de antes era imposición, etc. Todas estas cuestións teñen distintos puntos de vista, pero a obxetividade cae cando este surrealismo se traslada a unha televisión que está ó alcance de todos.

Para os que esteades a estudar periodismo, vouvos mostrar como non se debe tratar a un convidado, a non ser que lle queirades facer un ataque deste tipo. Nestes videos que vos vou mostrar a continuación podemos ver como Carlos Luís Rodríguez entrevista a Carlos Callón no programa Foro Aberto da TVG e faino dende unha perspectiva de loita e ataque de cara ó seu convidado.

Primeiramente vou poñer aquí un video-parodia que se fai en Youtube sobre esta entrevista, si se lle pode chamar deste xeito, no que se poden calificar este tipo de preguntas que o presentador fai. Dentro vídeo:

Vendo isto, xa vos podedes imaxinar como sería o resto. Este home, Carlos Rodríguez pensaba ó comezo da entrevista que o noso veciño de Castiñeiras (Ribeira) ía quedar sen argumentos á espera de algo así. Como vemos, as interrupcións por parte do noso presentador son constantes sen deixar lugar a unha explicación por parte do convidado en moitas preguntas que non interesa que sexan respostadas. Agora déixovos coa entrevista real. Cada un que a califique como queira, que opine sobre se isto é normal na TVG, si pasa só con determinados convidados, ou se foi un mal día que tivo o presentador. Dado que a entrevista dura ó pé duns quince minutos, pois imos por un link para que a poidades ver en Youtube, para favorecer o fluxo de tráfico nesta web.

1. Aquí tendes a primeira parte.
2. Logo ven a segunda parte.

Podería tamén tratar de comentar cada parte e cada tramo da entrevista, pero vouno deixar como tarefa para os nosos visitantes e para quen queira comentar algo sobre esta maneira de facer entrevistas. Como ben di o título do artigo: ¿Cómo non facer unha entrevista? Penso que agora, vendo todo isto, a meirande parte de vós coincidiredes con nós en que este non é xeito de tratar a un convidado.

Como dato, tamén comentar que o programa de Foro Aberto é grabado. O presentador tivo que cambiar a camisola ó remate da entrevista, pois a imaxe de Camacho no Mundial de fútbol facíase notar no ambiente de derrota deste home. Isto pasa cando pos tódalas forzas para facer algo que non das conseguido e veste na impotencia de asumir que as cousas non foron como se agardaban.

Agardo que este artigo dea para aquí para un foro aberto, pero para un foro sen ataques, con respeto e cordialidade coa que sempre nos tratamos todos aquí. Agardo con entusiasmo as vosas opinións!

• Noticias relacionadas en: Curiosidades, Novas, Videos

A Igrexa Católica non deixa de sorprendernos, e a manipulación de ditos medios de comunicación tampouco. Vemos o claro exemplo da canle televisiva Intereconomía. Recordamos que a información que dan neste lugar tampouco é moi fiable, pois non fai moito o programa da Sexta, El Intermedio, deixou en evidencia ós de Intereconomía por dar unha nova con información falsa que lle mandaron nun correo electrónico. Podédela ver clickando aquí.

E esta é outra das flamantes noticias, neste caso sobre o uso do preservativo en África, xa que o seu uso reduciría o virus da Sida considerablemente entre a poboación africana. Pero como non podía ser doutro xeito vánnolo explicar os mesmos reporteiros da canle para que vexades o que é facer periodismo. Dentro vídeo:

Como xa puidéchedes ver, en África o uso do preservativo é inaxeitado porque non se conserva en perfecto estado, os africanos teñen as unllas grandes, os africanos non saben ler, clima inaxeitado para a súa conservación, etc… Unha lista de burradas que deixan ó continente africano á altura do betún. Como claro, é moi costoso que se lle enseñe a ler, que se lle corten as unllas e que non teñan un lugar para conservar os condóns, pois todo iso amáñase coa Igrexa Católica.

E vós que opinades? Este video davos gaña de rir ou de chorar? Pensades que tendes que ter unha carreira para poder comprender o prospecto do preservativo? Tendes que facer a manicura antes de facer o amor? En África o uso do preservativo favorece ás infeccións por Sida?

• Noticias relacionadas en: Curiosidades, Foto Denuncia, Novas, Videos

Perplexas eran hoxe as novas da televisión cando nos informaban sobre un dos últimos artigos de CaboDeCruz.Net onde comentabamos a aparición dun barrio árabe dos séculos XII e XIII cando querían construir un parking. Pois ben, a conclusión desta nova é que o goberno da cidade co alcalde Miguel Ángel Cámara no seu cumio, ten a intención de retirar os restos arqueolóxicos para así dar paso á súa obra.

Esta xente antepón toneladas de cemento a séculos de historia da súa terra. Incrible. É coma se agora de repente empezamos a retirar a catedral de Santiago para facer alí un centro comercial, ou se eliminamos os Castros do Achadizo para facer un asador de churrasco. De verdade é que un non deixa de sorprenderse con decisións tan e tan absurdas desde calquera punto de vista. Co valor que ten a nosa historia, a historia dunha terra que é unha fonte inesgotable de riqueza e patrimonio tirada ó lixo.

A reacción dos cidadáns de Murcia é instantánea e perplexa cando ven que ducias de opararios na mañá de hoxe comezan a levantar ladrillo por ladrillo para tentar retirar unha totalidade 5.000 metros cadrados de barriada árabe e de historia da súa cidade.

• Noticias relacionadas en: Curiosidades, Foto Denuncia, Notas de prensa, Novas

Esta nova chéganos dende Murcia onde fai uns meses comezouse levantar o terreo para construir un parking que albergase os coches e mellorase o aparcamento da cidade. Tal foi a sorpresa desta obra que apareceron varios restos arqueolóxicos. Quedou así ó descuberto un barrio árabe dos séculos XII e XIII con todo perfectamente identificable, incluíndo unha mesquita de dito lugar. Todo un patrimonio ó descuberto que pode axudar a refornecer a historia desta cidade.

Entón o goberno local o que quer facer é algo faraónico. Nada máis e nada menos ca levar ladrillo a ladrillo toda barriada árabe e transladala a outro lugar para poder facer ahí o dito aparcamento. Isto sería un pouco razoable con algo normal, pero hai que mober a cantidade de 5.000 metros cadrados de historia murciana, e iso tan só para facer un aparcamento subterráneo. Tamén barallaban a posibilidade de elevar os restos para facer por debaixo o parking e deixar así todo visible. Pero en fin, algún dirixente debe pensar que iso se fai por ordenador cunha simple arrastrada de rato.

Entón agora a polémica está servida en tódolos aspectos, os cidadáns de Murcia están divididos por esta opinión e esta cuestión que é algo primordial e fundamental para a cidade. A todo isto súmaselle a perda xa fai uns anos duns baños árabes que foron demolidos para unha nova construcción na cidade, o que equivale a enterrar a historia dun lugar para dar paso a máis e máis ladrillo e cemento.

Na rede de redes xa temos uns cantos foros e perfiles de Facebook botando fume coas diversas opinións dos murcianos sendo a opción de conservar o patrimonio a máis consolidada entre o pensamento racial dun pobo. Pero como isto leva consigo un lastre político as opinións sempre son diversas.

Un caso semellante pasa en Galicia, por exemplo na cidade da Coruña coa muralla encontrada tamén nunhas obras que bordean o paseo do castelo de San Antón ata a praza de María Pita. Seguramente debaixo das casas e edificios que hai por alí haberá restos e máis restos antigos da cidade herculina, pero o dilema é tiramos as casas, conservamos as casas e ficamos co que hai? De seguro os coruñeses se porían a debatir o tema polas rúas da cidade.

Pero aínda máis preto de nós temos outro caso semellante: O Castro do Achadizo, no Campo. Alí podemos observar restos da nosa cultura castrexa que nos amosa unhas cantas vivendas. Expertos na materia afirman que o campo podería ser todo un pobo castrexo que está baixo terra, e que tamén identificaría parte da nosa historia tan cargada de restos arqueolóxicos. E de seguro que por debaixo de nós, das nosas casas, das nosas rúas haberá algo que nin se nos pasaría polos miolos. E nós qué? Tiramos coas casas?, Desaloxamos ós do Campo a outra ubicación?, Deixamos todo como está?

Isto é algo que tan só é unha noticia e unha suposición, pois con este artigo non se pretende fomentar ningún tipo acción perxudicial contra a xente do Campo, pois que che tiren a casa así por así amola bastante, pero cousas coma estas que pasan lonxe de nós fannos pensar que nada está fóra do noso alcance, do alcance do Cabo da Cruz.

• Noticias relacionadas en: Curiosidades, Notas de prensa, Novas

Esta nova non sería posible sen a colaboración de Dani Gestoso que nos proporcionou as imaxes. Aquí pódese ver a unha señorita podando as árbores que hai en frente do Club de Xubilados, pero en vez de estar cunha escaleira, unha banqueta ou algo polo estilo… Non!, súbese á árbore e a cortar… A iso chámolle eu coller o touro polos cornos. Xuzgádeo vós mesmos:

En fin, non penso que esta sexa a maneira de facer a poda das árbores, pero xa vemos que no Cabo da Cruz, cada un márcase o seu propio estilo, e si resulta, pois mira que ben…

Iso si, isto non é apto para calquera, xa que se caes ó mellor che sae a poda un pouquiño cara de máis. Para máis información podedes entrar aquí. Si tendes algunha outra modalidade de poda, ou de calquera outra cousa xa sabedes que estamos aquí para que nos contedes calquera cousa!

• Noticias relacionadas en: Curiosidades, Novas

Hoxe recibimos un correo dunha viguesa que está buscando datos sobre os seus antergos que viviron na nosa vila. Concretamente busca datos sobre a familia Romero Silva que ó parecer estivo asentada na nosa vila xa fai tempo. Para que vos informedes póñovos o texto que nos enviou:

Hola, os escribo desde Vigo, mi abuela paterna nació en Cabo de Cruz y no tengo mucha información sobre sus raices, me gustaría saber si alguien conoce o me puede indicar dónde dirigirme, pues me gustaría saber cosas sobre mis bisabuelos. Su nombre era Celia Romero Silva y su padre se llamaba Fidel. Mi abuela murió hace ya 10 años y vivió prácticamente toda su vida en Vigo pero me gustaría tener más información sobre sus antepasados. Muchas gracias

Se alguén ten información sobre esta familia, sobre descendentes, ou calquera dato que se poida aportar, sería de agradecer que o puxesedes aquí, ou que contactedes connosco para poder axudarlle a esta muller que busca entre nós parte do pasado da súa familia. E se es parente de Mónica, pois a partires de agora xa sabes que tés familia na cidade olívica.

Un saúdo e grazas de antemán!

• Noticias relacionadas en: Curiosidades, Novas

Foto: La Voz de Galicia

Un ano máis celebrouse o concruso de cabazas en Leiro onde pode participar calquera persoa cun exemplar desta planta que teña un tamaño e un peso fóra do normal como lle pasou a unha boirense que este ano se fixo co primeiro premio. Encarna Fernández, así se chama a campiona deste concurso afirma que a súa peza acadou ese tamaño por sí soa, nacendo de maneira espontánea nunha finca de Abanqueiro onde dende o seu descubrimento se mimou ata acadar un peso de 77 quilos.

Encarna afirma que xa se presentou o ano pasado, e que lle gustan moito as festas de Leiro de ahí que non deixara de acudir a estes eventos e por encima levar premios deste tipo. Curiosa é esta nova que nos mostra como nas terras do Cabo da Cruz nacen froitos dun tamaño considerable. Lembrando tamén as froitas que nacen nunha horta de Triñáns onde xa foi noticia o feito do desenvolvemento dos vexetais en terras tan puras e fértiles coma as nosas.

A gañadora non contaba con gañar este premio xa que no concurso preséntanse cabazas dun grande tamaño, pero este ano tocoulle a ela levar o primeiro posto. Finalmente afírmanos que a cabaza vaise cortar, separaranse as sementes para o ano que ven, e o resto será o manxar dos animais domésticos.

• Noticias relacionadas en: Curiosidades, Notas de prensa, Novas

Parece unha coña, ou unha broma con cámara oculta, pero é real. Hoxe pola mañá, cando lin o xornal vin a implacable noticia. Resulta que un home de Tomiño que tiña apnea do sono (que te quedas dormido en calquera intre), e que tiña dificultades respiratorias por mor da enfermidade, foi chamado para unha proba diagnóstica por terceira vez.

O conto ocorreu o un de marzo deste ano, cando este home foi a urxencias onde lle dixeron que o chamarían, e lamentablemente en dez días perdeu a súa vida.

Logo, despois de dalo de baixa na seguridade social e nas administracións pertinentes, o 27 de maio é chamado polo Sergas para facer a proba cando se reabre a ferida na familia que amablemente lle comunican da súa morte.

No 2 de xullo o tema volve á mesma cando soa o teléfono preguntando por este home para facer a dichosa proba, e ahí é cando a familia xa se mosquea con esta xente e lle explica as cousas sen calma algunha, como sería normal na situación.

Finalmente o día 2 de setembro a mesma chamada volta producirse na casa deste home que debe estar farto aló onde se atope desta indecencia do Sergas.

A familia está farta de todo isto e pide que se deixe de molestar en algo que é máis ca caótico nunha administración dirixida… ¿por quen?, xa que isto a pesar de lamentable é doloroso para quen tén que aturar este tipo de incoherencias.

Por parte do Sergas din que se adoptaron as medidas oportunas para non voltar chamar a esta casa, e que tratarán de coordinar ó persoal para facer unha xestión como é debido.

Lembrar como datos que: en Galicia ó pé de 140.000 galegos están á espera dunha proba diagnóstica e Galicia xunto con Canarias son as dúas comunidades autónomas con peor listaxe de espera.

Isto é unha mostra máis da incompetencia que temos en materia de sanidade, e que todo segue igual estea quen estea ó cargo na Xunta, ou na directiva desta entidade. Vimos non fai moito a testemuña dunha veciña do Cabo da Cruz que se laiaba da dependencia dun servizo que ata agora había, e que por motivos non se sabe moito cales, isto carece dunha base que nos arroupe a tódolos cidadáns nunha materia tan importante como á a sanidade.

• Noticias relacionadas en: Curiosidades, Foto Denuncia, Notas de prensa, Novas