Xa facía algún tempo que non tiñamos novas desta iniciativa crucense: O Socaire. Trátase dunha revista elaborada pola asociación de veciños A Unión para tódolos socios e veciños de Cabo de Cruz. Este rexurdimento débese a que a directiva quer reflexar aquí o seu paso pola entidade indicando diversos temas e actuacións dos dirixentes actuais.

A revista vai a ser entregada ós socios que acudan no día de mañá á asamblea xeral que hai convocada. Nela ides poder atopar tódalas actividades propulsadas pola asociación nestes últimos catro anos de mandato. Poderedes ver os titulares que máis moveron á xente de Cabo de Cruz neste tempo entre outras cousas. Vanse a tratar temas dende a depuradora, o muelle novo, o plan parcial, o médico ata os pasos elevados tan de moda a día de hoxe.

Veredes tamén tódalas xestións que a Unión fixo ante o concello de Boiro, así coma tódalas reclamacións e peticións feitas dende as oficinas da entidade. Haberá retratos dunha morea de veciños nas actividades feitas por mor das Letras Galegas e do Nadal. Tamén veremos as homenaxes ó noso benquerido Club de Remo polo seu percorrido nas distintas regatas ó longo da xeografía española.

Comentar tamén que un dos medios que a Unión está a explotar na rede de redes é a súa páxina web. Unha web que recibe unha morea de visitas por parte dos veciños e veciñas de Cabo de Cruz e onde se tratan e trataron moitos temas de interese para todos. De feito, nesta web xa todos podedes ver un pequeno avance desta revista de O Socaire.

Na xuntanza de mañá, o presidente, Benigno Sánchez presentará o banlance de contas e a súa retirada. Dende mañá vaise a dar un prazo dun par de semanas para que algún veciño ou veciña tome o mandato da entidade, xa que o presidente non vai facer candidatura. Como ben sinalou, «a esencia da Unión está máis viva que nunca», pero se ninguén dá o paso, seguirá el ó frente da Unión.

• Noticias relacionadas en: Cultura, Notas de prensa, Novas

Nas axudas da Xunta de Galicia ó idioma galego deste ano, o orzamento veuse mermado nun 35%. Isto tradúcese en que os equipos de normalización e dinamización lingüística da comarca do Barbanza van a ver un notable descenso na economía que promove o idioma de Galicia. Ista reducción tradúcese en máis de 15.000 € que o goberno de Núñez Feijoo lle quita á nosa lingua.

Segundo a prensa escrita, as verbas da Coordinadora de Equipos de Normalización e Dinamización Lingüística do Barbanza foron: «Parécenos totalmente inadecuado que se concedan estas axudas en abril, cando quedan apenas dous meses para o remate do curso, o que provocou que a actividade dos equipos estivese practicamente paralizada durante todo o período lectivo».

Esta mesma coordinadora sinalou que os orzamentos para Galicia se reduciron nun 20%, e agora especialmente para a nosa bisbarra a outra reducción é do 35%. Isto vai a impedir que se fomente o noso idioma, que se sigan publicando revistas que levan moito tempo entre nós e que a cultura dun pobo coma o galego quede reducida por culpa que quen odia ó galego.

A entidade fixo un chamamento á Xunta para tratar de negociar e que a Consellería de Educación non siga por este andar no que os nenos e nenas galegos non poidan aprender o seu idioma propio de Galicia. A todo isto, o goberno galego non se pronunciou neste tema e tampouco dou ningunha explicación ó respecto.

• Noticias relacionadas en: Cultura, Notas de prensa, Novas

Xa foi tamén nos anos 2006 e 2008 cando o noso concello recibiu este distintivo da Bandeira Verde – Municipio Resposable. É un distintivo moi positivo para o noso entorno, xa que isto anima sempre a moita xente a achegarse a ver as nosas paraxes e a nosa maneira de vivir en armonía co medio ambiente. É a Fuci (Federación de Usuarios e Consumidores Independentes) a que otorga este galón ós concello que desenvolven políticas respetuosas co medio ambiente.

O principal detonante desta nova foi a recollida de residuos e limpeza, o consumo enerxético responsable, a educación ambiental e a participación da cidadanía nas iniciativas promovidas polo concello de Boiro. Cabe dicir tamén que este ano xa é a undécima edición do galón onde o noso concello xa levou tres recoñecementos de méritos pola súa boa labor.

Será o noso rexidor Xosé Deira o que vaia a Madrid a recoller a Bandeira Verde nun acto que terá lugar o vindeiro día 7 de maio. Vai ser un día no que a xente do concello e tamén de Cabo de Cruz debemos estar ledos por facer da nosa vila e arredores un lugar mellor para vivir.

Dende CaboDeCruz.Net agardamos que o concello siga con esta dinámica e adicación a un tema tan importante como é coidar da terra onde vivimos.

• Noticias relacionadas en: Cultura, Notas de prensa, Novas

Fai uns días estiven falando con Pablo Chouza, cousa que sobran as palabras para saber quen é este mozo do mítico bar «O Codillo». Pedinlle se podía colaborar dalgún xeito con esta web e mandoume unhas ligazóns bastante interesantes a uns traballos del e mais do seu irmán Toño Chouza. Aquí vos deixo un enlace a unha curtametraxe feita por estes dous irmáns do Cabo da Cruz. Sen máis: O camiño da Loureira.

Aquí podedes ver a dúas persoas do Cabo da Cruz. Eu coñezo ó home que é o señor Ramón Revira, en paz descanse. Foi un home que tiña unha vitalidade increíble a pesares da súa idade. Conservaba tamén unha memoria e un recordo do pasado digno dunha enciclopedia histórica. E o mellor de todo, a elaboración da súa caña de herbas, ahí si que lle daba ben este home.

Decidin persoalmente poñer este video en homenaxe á xente do Cabo da Cruz. Lamento non coñcer á muller que sae no filme (aínda que me soa bastante), pero iso déixoo coma unha tarefa para os nosos lectores, e tamén para ver si nos poden aportar algo desta muller para poder completar esta pequena descripción dos actores.

Sempre é de agradecerlle ós nosos lectores e colaboradores a información que nos dades, de feito non tardou moito en chegarnos un mail ás nosas dependencias de parte do amigo Suso Marañas dicindo que a muller deste video é a sogra de «Juan o negro» do Corviño. Certo é que a podemos ver todos nos días de sol sentada á porta e se non me trabuco xogando unha partiña ás cartas, ¿Pode ser?

Agradecer tamén ós irmáns Chouza esta labor e tamén que nos cedesen os seus traballos para poder disfrutar todos deles. Agardamos que sigades así co voso traballo e tamén agardamos poder vervos aquí de por sempre. Gracias pola vosa colaboración!

• Noticias relacionadas en: Cultura, Novas, Videos

Todos puidechedes ver fai uns días a entrevista dun xornal que colgamos aquí nesta web, pero como nos parecía que había algo que nós tamén queriamos saber, pois decidimos por facer algo así. O primeiro foi contactar co entrevistado para pedirlle unha entrevista á cal aceptou de grande gusto, e logo soltar as nosas preguntas, algunhas delas importantes para o Cabo da Cruz, outras para a nosa xuventude. Aquí vos queda algo do que non debemos desbotar nin unha palabra. Para CaboDeCruz.Net: Carlos Rodríguez Muñiz:

Aquí temos a Carlos Rodríguez, un home do concello de Boiro que ten varias marcas na súa vida. Leva a empresa da súa familia e tamén é presidente da Asociación Boirense de Empresarios, entre outras cousas. Nada menos para unha persoa. A súa afección á música fixo deste home un home de traballo, pero tamén de festa, é certo iso?

Non sei si se pode decir así pero o que sí é certo e que acudo presto á chamada dun amigo gaiteiro ou mesmo ás convocatorias que, polo miudo, levan a cabo os meus amigos e que case sempre rematan en cantata. Decir que, como estarán pensando aqueles que coñezan ó meu pai, a xenética manda.

Pero, para comezar, Cómo se chega a ser empresario e presidente dunha asociación coma a ABE, é cuestión de sorte, de formación, vai na persoa,…?

Sigue leyendo… »

• Noticias relacionadas en: Cultura, Novas

No día de onte, ó entrar na web todos puidemos ver un comentario de Suso do Trisquel (por certo Suso, modifiquei o comentario teu coa ligazón correcta, como podes comprobar. Fágoo co teu permiso) onde nos indicaba a web persoal dun amigo que ten escribido aquí moitas liñas, en concreto cos pasos elevados do vial que une Boiro co Cabo da Cruz. Despois de ler a súa opinión quixera darlle algún tipo de publicidade para que o amigo poida ter máis visitas no seu blog e tamén para que contrastedes opinións.

Paréceme un bo xeito de comezar as andainas por internet, dahí que este noso amigo fai da estrada un circuito e mesmo comenta moitos aspectos importantes e considerables da manifestación do pasado sábado. É outra maneira de ver este tema que cada un pode ter para sí. Agardo que esta ligazón ó blog de Terra Barbança sexa de proveito para todos vós.

Tamén pedirlle a este amigo de conversas e debates de CaboDeCruz.Net que siga vindo por aquí e mostrando as súas opinións que serán ben recibidas como foi ata o de agora.

• Noticias relacionadas en: Cultura, Novas

Pois si amigos, o que máis chama a atención nunha web son as súas galerías de fotos e videos, porén queremos que isto siga sendo unha referencia para todos. Sabemos que hai xente que nos segue mesmo dende o outro lado do charco e de distintos lugares do mundo, entón a nosa misión é facer que se sintan coma na casa.

Botando unha ollada na web do amigo Miguel A. Lomba, a coñecida CaboDeCruz.Org, pois vin bastantes fotos que me gustaron moito e decidín pedirlle permiso para poder colgalas aquí tamén. Miguel, coa súa cordialidade sempre mostrada de cara a nós, deunos permiso para poder colgalas, pois sen a súa axuda e colaboración non teriamos ningún destes fermosos retratos que aquí vos mostramos. Miguel, queremos agradecerche a túa colaboración con esta web, non só con fotos e videos, senón con outras cousas das que non dubidaches en botarnos unha man. Porén, gracias e moito ánimo na túa labor.

Dedicimos mostrarvos unhas fotos dos máis cativos da vila en dúas citas que os fan estar máis contentos do normal: o Nadal e o Antroido. Nestes albums poderedes ver a ledicia dos nenos e nenas do Cabo da Cruz no seu colexio Sta. María do Castro, en Valiño.

Outro referente a mostrar que xa forma parte da nosa historia e cultura é a xente que anda ó mar. É unha sorte poder contar con estas fotos que nos mostran os lugares do globo polos que anda a xente do Cabo da Cruz. É moi duro ter que deixar esta terra na procura dalgo mellor para os nosos fillos, pero aquí tendes a algúns destes homes que co seu bolso ó lombo tiran millas na procura de traballo e paisaxes tan fermosas.

Agardamos que disfrutedes desta sección de fotos onde moitos de vós estaredes identificados nalgunha e non dubidedes que estamos traballando arreo para que isto siga en pé. De feito temos na recámara un traballo de dous irmáns do Cabo que é digno de ver polo seu contido e a súa emoción. Que si, que no Cabo da Cruz o que nos sobra é arte! Xa veredes.

E se queres opinar sobre algunha destas fotos xa sabes, esta web ten cabida para todos vós, para que nos contedes o que queirades, xa que CaboDeCruz.Net é a vosa web de referencia!

• Noticias relacionadas en: Cultura, Novas

Como todos sabedes e dende fai xa tempo, o día de onte, 21 de xaneiro do 2010 foi un día en defensa dos nosos dereitos e en defensa do noso legado: do idioma galego. Todo isto veu a conto dun decreto que foi creado polo actual goberno da Xunta e onde as bases dese decreto foron rexeitadas pola meirande parte dos galegos, entre os que destacamos a Real Academia Galega – como organización, entre outras -  e tamén foron rexeitadas polos milleiros de persoas que se achegaron á cidade de Compostela para mostrarse contrarios á política lingüística deste novo goberno.

Nos nosos colexios e institutos, cífrase de entre un 80 e un 90 por cento do profesorado que estivo ausente nas aulas. Gardando sempre así os servizos mínimos que fixeron posible que os poucos rapaces asistentes á docencia, puidesen ter un desenvolvemento das actividades do máis cotidián posible. No Cabo da Cruz, segundo o xornal La Voz de Galicia (non segundo a xente do Cabo), un corenta por cento dos rapaces faltaron ás clases. Tamén no instituto Praia Barraña, de 365 matriculados, tan só houbo 30 alumnos no centro, isto é un 8.2 % de asistencia.

Isto ten un reflexo claro na nosa sociedade: o rexeitamento do decreto plantexado polo goberno de Núñez Feijoo. Onte, o persoal docente galego, os alumnos galegos, e a xente que quer vivir e aprender en galego, dixéronlle ó señor Feijoo que non están dacordo coa súa maneira de facer política lingüística, que non queren que tan só un tercio das clases se impartan en galego, que non queren que un tercio das clases se impartan en inglés. Pois si xa é complicado atender a unha clase onde se fala galego ou castelán, a complexidade duplícase ou triplícase á hora de preparar unha asignatura en inglés. É máis, non existe unha caixa de pandora para sacar mestres que dominen o inglés coma para dar a súa asignatura/s en dita lingua. Non é viable este decreto.

¿Qué pasa con Google?

Como todos ben sabedes, esta web está feita íntegramente en galego, xa que a meirande parte da xente do Cabo da Cruz é galegofalante, ou como nós dicimos: falamos o jallejo. Pois si buscades esta web no máxico buscador, fixádevos que á dereita da entrada pon a peculiaridade de Traducir esta página. Lamentable é que unha empresa destas características non saiba distinguir que un galego é capaz de ler en galego e tamén en castelán.

Como podedes observar, CaboDeCruz.Net, páxina en galego hai que traducila. Pola contra, www.ligaact.com, páxina en castelán, hai que entendela. Por iso, dende aquí queremos que o ollo de Google nos vexa para dicirlle que os galegos sabemos do noso idioma, e tamén sabemos castelán, que aquí non hai que traducir nada. Se queremos traducir, sabemos todos que tendes unha ferramenta marabillosa como é o voso traductor.

En fin, agardamos que o noso idioma non sexa un atranco, senón unha vantaxe para todos e todas, e quen non o saiba, animámolo a que o aprenda, pois aprenderá así a nosa cultura, entenderá á nosa xente, saberá algo máis da nosa terra. Xa que os idiomas son unha riqueza inesgotable de recursos que todos e todas debemos protexer, e máis os responsables diso en cada momento.

E ti que opinas?

• Noticias relacionadas en: Cultura, Notas de prensa, Novas

Esta noite pasada foi unha noite chea de ledicia e ilusión para os nosos cativos, e os non tan cativos, pois a presencia deses seres máxicos que fan unha longa viaxe, foron a causa desta data: 6 de Xaneiro. Data na que a estas horas moitos dos cativos do Cabo da Cruz están cos ollos espetados nos regalos que os Reis Magos lles trouxeron polo seu bo comportamento. Onte pola noite, chegando de camiño á miña casa atopei cos Reis Magos por pura casualidade, pois estaban repartindo os agasallos polo Cabo da Cruz.

Vin a Melchor, a primeira vez que vía algo semellante, pois o dispositivo entre reis, paxes e camellos era impresionante. Díxome Melchor que este ano os nenos do Cabo da Cruz portáronse bastante ben, motivo polo que van ter uns bos regalos. Pero este ano, se cadra non van a traer tantos porque un dos camellos caeu enfermo ó pouco de partir de Oriente e teñen que vir algo máis descargados para que o animal non sufra. Os maiores a isto chámanlle crise, pero non é certo. Pequenos, pequenas do Cabo da Cruz, dende CaboDeCruz.Net queremos transmitirvos as palabras das maxestades e dixeron que os regalos deste ano van a ser uns regalos traídos con moita ilusión e cariño para todos vós. Porén debedes facer un esforzo de conformismo de cara este Nadal para que os Reis vexan en vós comprensión e que para o ano ese camello non enferme e poida vir máis cargado ca este ano.

O rei Melchor pediume expresamente que vos dixese que o comportamento de todos vós, neste 2009, foi do mellor, e que agarda que neste ano 2010 sexa así ou máis bo. Este rei agarda moito de vós: que lles fagades caso ós vosos maiores, que estudedes moito, que axudedes na casa e que o pasedes moi ben. En fin, este día sen dúbida que é o voso día, non esquezades ir á casa dos avós, dos padriños, dos tíos e dos amigos, pois nunca se sabe onde os Reis Magos puideron deixar algo no voso nome.

De parte das maxestades de Oriente e da administración de CaboDeCruz.Net desexámosvos un moi feliz 2010 que veña cheo de traballo, de ilusión, de desexos cumpridos e de todo o mellor para os máis cativos e non tan cativos. Agardamos que disfrutedes moito dos agasallos para que o vindeiro ano sexan máis e mellores.

Un cordial saúdo: Os Reis Magos de Oriente

• Noticias relacionadas en: Cultura, Curiosidades, Novas

O concello de Boiro volta a ofertarnos cunha chea de contidos de cara este novo Nadal. A formación xa comezara coa construcción dun edificio de formación no polígono de Espiñeira onde se impartirán clases de hostelería e cociña, e agora o rumbo marca un pouco ás novas tecnoloxías. Electrónica, ilustración dixital, redes e computadoras, cultura, ofimática e moitos máis serán os temas a abordar por esta nova aula mentor que abrirá as súas portas en breve na nosa comarca.

O ente local presentou onte a oferta desta nova iniciativa que trata de achegar estas actividades formativas ós boirenses a través de Internet con cursos on-line e cun titor de apoio permanente para o alumnado. Estes cursos son libres e aplican unha nova vantaxe de cara á escolla dos horarios por ser vía web. Cando se complete o curso, farase unha proba na aula mentor da casa da cultura para conceder a acreditación final dos coñecementos obtidos.

Se non tedes conexión a Internet podedes acudir á aula de informática da casa da cultura para poder seguir os cursos dende alí. Na Cahada será tamén onde deberedes solicitar a matrícula dos cursos formativos onde vos atenderá Elena Dosil, como responsable de proxecto.

Esta nova proposta vén dada da man do concello de Boiro en alianza coa Xunta de Galicia e mais co Ministerio de Educación estatal. Dende o Cabo da Cruz agárdase tamén que a nova liña de fibra óptica nos chegue para poder ter unha conexión como Deus manda. Agardamos que as entidades aquí nomeadas poidan botarnos unha man para que a conexión a Internet fomente tamén a nosa formación e capacidade de aprendizaxe.

• Noticias relacionadas en: Cultura, Notas de prensa, Novas