Como podedes ver, o curto gañador do certame «El corto y cálido verano» de Facebook, foi o de Toño Chouza, o cal xa vos mostramos aquí para todos aqueles que o puidesedes ver. Agora, vano a emitir na canle TCM (en dixital ou en R), xa que como podedes ver aquí a emisión será o domingo 29 de agosto a partir das 6.30 da tarde durante todo o dia, facendo un especial con entrevistas ós directores e a emisión de curtametraxes, entre elas a de Toño.

Agardamos que os máis rezagados poidades disfrutar agora, dun curto gañador, dun cine de calidade creado pola xente de Cabo de Cruz. E como non, que apoiedes sempre ós veciños, xa que con cousas coma esta fan grande unha vila coma a nosa.

Asi que xa sabedes, o domingo 29 de agosto ás seis da tarde, poderedes ver a estrea de «Por la mañana«. E si queredes ver un adianto, visitade esta web para ver ós gañadores de dito concurso. Non faltes!

Fai uns días, o veciño Toño Chouza entraba aquí para pedir un apoio para o seu curto que presentou no festival «El corto y cálido verano». Pois si, arrasou coa súa producción. Pero dende aquí pensamos que non gañou tan só polas votacións dos amigos que pode ter en Facebook, senón pola calidade do traballo que presentou a este concurso.

Os que aínda non vistes o curto, podemos asegurarvos que é algo digno de ver, onde se marca xa un estilo propio relacionado con outras obras que ten este home no seu arquivo. Sen dúbida, unha historia contada en pouco máis de 10 minutos que engancha dende a primeira escea.

Pois que dicirche Toño, parabéns polos teus éxitos recollidos e por recoller e segue sempre así. Como anécdota e breve consello vouche contar algo que vin na televisión cando era un cativo e que me serviu de moito: estaban entrevistando a un compositor de música galego cando lle preguntan – ¿Cal é o segredo para acadar a mellor partitura? - o home respostou sen dubidar – Compoñer tódolos días, queira ou non queira, porque o día menos pensado a mellor partitura chega ós meus miolos -.

Con isto quero dicir que nunca abandones o teu traballo, o que che gusta, se sempre constante, xa que o teu mellor filme, de seguro vai saír dun traballo diario e no día menos pensado. Fáloche dende a curta experiencia na que apliquei este consello e sempre me foi ben. Pedirche tamén que nos cedas ese curto campión para que a xente que entra aquí e que non ten Facebook que poida ver a calidade dun traballo ben feito.

No nome de CaboDeCruz.Net, parabéns, segue así e conta con nós para o que faga falla, xa que os teus éxitos son os éxitos da túa vila, e os éxitos da túa vila son os éxitos de todos. Grazas Toño.

No día de onte o noso veciño Toño Chouza entrou nesta web para pedirvos axuda. Tan só para que un curto das súas produccións poida saír na televisión e darlle máis empuxe á carreira deste crucense. Por iso tan só vos pide unha cousa, que lle votedes en Facebook para que lle valoren o seu traballo e consiga o seu propósito. Tan só vos levará un minuto facerlle un favor a este veciño. Un minuto que agora pode ser algo insignificante para nós, pero que se cadra nun futuro é algo enorme para el. Dende CaboDeCruz.Net queremos pedirvos toda a colaboración posible.

Aquí vos deixo o seu escrito:

O concello de Boiro avoga por unha nova maneira de facer turismo: o turismo marítimo. A iniciativa trata de que un grupo de xubilados colaboren desinteresadamente nesta tarefa de mostra da cultura etnográfica de Boiro e tamén de Cabo de Cruz. Existen moitos puntos de encontro nestas visitas ós recunchos da nosa vila e concello. Por exemplo, un repaso polos muíños de río en Bealo e Ponte Goiáns.

Pero tamén se marcan un percorrido pola ría e polo porto de Cabo de Cruz onde se lle vai explicando á xente que queira aprender cómo se cría o mexillón nas bateas, dende que se vai á cría ata que sae en sacos no camión que os leva. E quen mellor para explicar todas estas cousas cá xente con experiencia coma os nosos maiores.

Tamén se trata de que a xente coñeza os traballos e oficios autóctonos coma un taller de elaboración de nasas situado en Rebordelo. Un oficio de cara ó mar e polo mar, motivo principal desta mostra de cultura municipal. E aínda non queda ahí a cousa, senón que se tratan de explicar moitas outras cousas nestes percorridos.

Os turistas sorpréndense desta riqueza que temos na nosa vila e concello e láianse de que a xente daquí non coñeza na súa totalidade parte da nosa historia que nos identifica coma vila e como pobo. Porén, xa se está plantexando o de traer ós escolares a estes percorridos para que dende os máis cativos saiban das tradicións, costumes e medios de vida dos seus antergos.

Toda unha iniciativa con moito impulso feita dende o concello de Boiro que vemos con ollos moi positivos dende Cabo de Cruz. Porén, animamos a todo o mundo a que fagan disto algo persoal, algo seu e que se dispoñan a visitar os recunchos con máis historia do noso concello.

Foto de C. Queijeiro

Hoxe esfollando a Voz, vin unha entrevista a un deportista recoñecido na comarca polo seu afán de superación, de retos e obxetivos a bater e outras moitas cousas. Trátase de Juancho Armental. Pero sen dúbida, o que marca a este tipo de xente é a superación, a eliminación de barreiras, o «erguerse tras caer unha e outra vez«. Por iso mesmo queremos que polo menos leades nestas verbas, como é a mentalidade dun deportista de élite da que podemos sacar conclusións para a vida mesma.

Sen máis, a entrevista:

Juancho Armental é un galego de bandeira, non só porque os seus retos deportivos son propios do mesmísimo campión de España David Meca, senón que ademais se encarga de reclamar o lugar que lle corresponde ao deporte galego no mundo.

-Está preparando de novo a travesía Sálvora-Barraña, ¿como se atopa ao volver a enfrontarse a este reto?

-Estou moi motivado, os retos están para conseguilos e se un se resiste o que hai que facer é collelo con máis forza. Ademais, xa levo un tempo preparándome, e segundo pasan as semanas, anímome máis.

-¿Cantas horas adestra ao día?

-Adoito adestrar todo o que me permite o meu traballo. Agora no verán teño un pouco máis de tempo, hai menos xente nas empresas e teño un respiro. Adestro seis días á semana, e fago dúas sesións, unha pola mañá e outra pola tarde.

-Cando unha persoa non consigue algo réndese, vexo que non é o seu caso.

-Para nada. Ademais, se non o conseguín a primeira vez foi porque non fixen as cousas de todo ben, ao mellor o mar non estaba no mellor momento, e eu tampouco estaba ao cen por cento. Hai que mirar adiante e non coller medo a nada.

-Falar así non é doado, ¿dáse conta de que vostede pode ser un exemplo para moita xente?

-Para min iso é un orgullo. A soa idea de que poida incentivar a alguén a facer deporte, ou que se anime a proporse retos, ou que loite polo que quere, para min é algo moi satisfactorio.

-¿Cal é o verdadeiro motivo polo que fai todo isto, cartos, fama?

-Para nada. O meu obxectivo con todo isto vai moito máis ala. Busco que a xente empece a recoñecer de unha vez o lugar que se lle debe dar ao deporte galego.

-¿Que é, segundo vostede, o que falla?

-Pois o principal é a falla de apoio por parte das Administracións. Temos moi bos deportistas, xente que esta traballando a nivel mundial e aquí non se oe nada.

-Fala das Administracións, ¿non recibiu ningún tipo de apoio cando realizou o seu reto?

-Non, nin sequera se me escoitou. Enviei propostas á Xunta de Galicia, ao Concello de Padrón, ao que lle fixen unha proposta para facer o camiño de Santiago, despois da miña travesía a nado, e nada. Fixen todos os movementos posibles dende o meu lugar, e non tiven obtiven ningún resultado. Hai veces que te cansas de petar a portas que están pechadas.

-Fala de propostas que non foron escoitadas, ¿considera que o deporte galego está infravalorado?

-Por suposto que está infravalorado, discriminado e todo o que lle puideramos chamar. Cando ven alguén de fóra todo son facilidades, mentres que os deportistas autonómicos teñen que buscarse a vida eles sos, e moitas veces non atopan apoio. Ás veces penso en enviar as propostas en inglés, seguro que así responderían.

-¿Que se pode facer ante esta pasividade por parte dos gobernantes?

-O primeiro é facer que te escoiten. Sempre digo que o anonimato silencia moi boas ideas. Hai que facer ruído, parece que só así che fan caso. Por exemplo, a min antes non se me recibía na Xunta, unha vez feito o primeiro reto, conseguín que polo menos se me escoitara.

-Dedícase á psicoloxía e nalgún momento traballou con deportistas, ¿agora mesmo ten algunha iniciativa neste eido?

-Si, estamos preparando o servizo itinerante de asesoramento para deportistas, que traballaría con deportistas de elite de todas as disciplinas. Tamén teño a idea dun programa para todo tipo de deportistas, non só os de elite. Cando comezas a practicar un deporte ensínanche os golpes básicos ou como moverte, pois tamén sería importante que alguén che ensinara como facelo psicoloxicamente falando.

Como podedes ver, o principal problema do deporte galego é a Administración, a falla de promoción dos nosos deportistas, a falla dos medios dos que hai que dispor para chegar máis lonxe, etc. Non fai moito, co comezo deste ano Xacobeo, vemos como dun xeito completamente inútil, o goberno galego de Núñez Feijoo trae xente de fóra.

Todos vos acordaredes deste atleta NON galego que veu facer a nado unha travesía na que se metía por un río cara os adentros de Santiago de Compostela e chegaba finalmente ó Obradoiro. Ben, pois para isto mesmo, sobran atletas galegos que o fagan e, por qué non podería ser Juancho Armental a figura deste Ano Santo? Pola teima dos gobernantes.

Dende CaboDeCruz.Net agardamos que este mozo chegue lonxe nos seus obxetivos e que o deporte galego se oia máis fóra das nosas fronteiras, xa que se non se oe no noso interior, dificilmente se vai notar fóra. Dende Cabo de Cruz e dende a praia onde sae na foto este deportista, dámoslles ánimo a toda a xente que loita día a día por superarse sempre unha vez máis. Como dicía un filósofo grego, a loita sempre é contra un mesmo, pois a loita contra os demáis case sempre estará perdida.

Son numerosas as obras deste artista que ten no seu legado sen chegar á maioría de idade, pero deunos luz verde para mostrarvos un curto que fixo el do seu puño e letra. A obra chámase «O gato con fame» e está feita totalmente á man cunha técnica depurada e elaborada por Lado. Aquí tendes unha mostra do seu bo saber:

Como podedes observar foi un pequeno traballo para a escola no que o autor puxo moito empeño e sacou o que vedes, nin máis nin menos ca unha pequena historia dun gato que fai o imposible para acadar unha pouca comida. En CaboDeCruz.Net non somos moi expertos na materia, pero soubemos valorar este traballo. E que ben fai este home lucindo traballos da terra que nos dan un forte impulso coma o «Íscalle lura» dos Heredeiros da Crus para a banda sonora, en vez de coller música de fóra como podía ter feito.

Xa puxemos aquí algunha que outra obra que naceu en mans de xente de Cabo de Cruz, e isto indica que temos madeira para o que faga falta, Agardamos que Pablo nos ceda algún dos seus traballos: debuxos, esculturas, curtos, etc. xa que o que queremos é promocionar dalgún xeito a esta xente que ten moito que ofrecernos a todos. Por iso, Pablo, queremos felicitarche polo teu traballo e que sigas así de por sempre, xa que aquí tes un espazo na Internet para o que ti dispoñas.

Ánimo Artista!

O nome de Cabo de Cruz é levado por moita xente aló onde pisa. Un reclamo máis para a nosa vila é Toño Chouza, un crucense que se somerxe no mundo das cámaras e do audiovisual para crear arte. Este veciño leva xa feitas ó pé dunhas trinta curtas ó longo da súa carreira e tamén xa leva gañados algún ca outro premio en Galicia e fóra da nosa terra. No ano 2007 consolidábase co premio Acción cun traballo que fixo na colaboración da súa avoa chamado Somnium. Con esta curta tamén se fixo cun galardón en Madrid.

Pero o seu último lance vaino a dar en certames de Cataluña e Madrid para os que foron seleccionados dous dos seus traballos nun concuro promovido por TVE. Non temos dúbidas que este mozo vai dar moito que falar coas súas curtametraxes en tódolos ámbitos. Aquí xa presentamos unha obra súa na que se plasma a calidade do director representado algo daquí, do noso, e quen mellor para facelo ca un home de Cabo de Cruz.

Fai xa case un ano, por encargo do Concello de Boiro, filmou un documental sobre a Romaría de San Ramón e sinalou: «Deixei que fose a xente a que, a través das súas experiencias, explicara a historia e as particularidades da festa». E que mellor maneira de presentar algo ca coa opinión da mesma xente.

Pero os labores de Toño non se aferran á monotoneidade nin á monotemática, senón que destacan tamén pola sua variabilidade en técnica, temática e argumentos. Atrévese tamén con efectos especiais porque: «Descubrín que ofrecen moitas posibilidades á hora de afrontar a tarefa de escribir un guión, xa que podes incluso crear aos actores». Como vedes, para Chouza non existen as fronteiras detrás dunha cámara.

A súa última obra titúlase: Yo hice un curso de yoga. Un título que mestura ciencia ficción e romance, pero que o autor explica moi ben de qué vai: «A historia xira ao redor dunha parella de descoñecidos que se queda encerrada nun centro comercial de Barcelona cando estala unha chuvia de meteoritos. Quédanlles quince minutos para cumprir os seus obxectivos», sinala.

Pero o obxetivo a acadar por este director de cine é o de grabar unha película, xa que segundo afirma: «Teño claro que este é o meu mundo, no que me sinto cómodo, pero penso que ata que un non roda unha longametraxe non pode considerarse director de cine».  Un home que está enrolado en diversos proxectos e que nestas datas poderédelo atopar por Cabo de Cruz, xa que vén para cumprir varios encargos detrás da cámara e seguir dándolle vida á súa carreira.

En fin, aquí tendes a todo un director que agardemos que nun futuro non moi lonxe chegue moi alto no seu sendeiro ata o máis alto. E queremos tamén ofrecerlle a Toño Chouza este pequeno espazo en Internet para o que precise sempre, xa que para nós é unha honra ter a xente así e que por encima sexa de Cabo de Cruz.

Fomos miles as persoas que alí estivemos, segundo a entidade, a cifra pode variar, pero o que non pode variar é que se encheu dúas veces a praza do Obradoiro onde se tivo que ler por duplicado un manifesto en contra dun decreto. Un decreto imposto polo actual goberno de Núñez Feijoo onde se desprestixia completamente a lingua galega. Un desprestixio baseado na contraria ó que di, por exemplo, o Estatuto, entre outros documentos oficiais aprobados por unanimidade no Parlamento galego e époco do señor Fraga Iribarne.

Isto pode parecer pura política, é certo, pero hai que miralas cousas dende outro punto de vista. Un punto de vista no que os rapaces de Cabo de Cruz, como a cousa siga así, non terán a oportunidade de aprender no seu idioma galego. Estudos actuais indican que a meirande parte dos mozos que saen da ESO, non teñen garantidos os coñecementos mínimos en lingua galega, véndose estes superados pola lingua de fóra, do castelán.

Para que vexades a implicación da xente nestes actos de defensa dunha lingua, vou a mostrarvos algunha foto do que foi esta manifestación na cidade de Santiago de Compostela:

Como podedes observar nesta instantánea, na praza do Obradoiro non colle nin unha palla, debido á afluencia masiva dos galegos e galegas. E para calar algún que outro rumor do tipo: «El que defiende el gallego es del Bloque«, non señores, aquí había tamén xente do PSOE e do PP, aínda que non se mostren como tales. A fala non é unha cuestión política, senón que é unha cuestión cultural e de identidade do pobo galego. Vexamos na imaxe como tódolos partidos apoiaron a manifestación, agás o goberno galego:

Aquí estabamos todos os galegos e galegas que queremos e reivindicamos que o galego forme parte de nós, que o galego nos una como pobo e que poida formar parte do día a día. Porén, en Cabo de Cruz, pensamos que debemos tamén sinalar que a nosa vila fala galego. E por qué? Porque nosos pais, avós, primos, irmáns nos ensinaron a nosa lingua, a lingua galega.

Agardamos que nas vindeiras manifestacións a prol do noso idioma esteades todos os que poidades, e para que vexades ó completo o que foi esta manifestación, queremos mostrarvos tódalas fotos que sacamos o día das Letras Galegas. Aquí as tendes.

E para que vexades a magnitude do evento, queremos poñervos un video no que se mostra unha panorámica da praza do Xacobeo onde a Catedral de Santiago nos arroupou e animou pola nosa causa. Cantas almas alí metidas e unidas pola nosa lingua:

Como vedes, isto foi unha auténtica festa onde os galegos estivemos ledos do noso idioma e dixémoslle moi claramente ó presidente da Xunta, que a actual política lingüístca non está acorde coa realidade de Galicia, e que ten moitas cousas que cambiar para que isto non volte acontecer.

A revista está nun formato case universal, é dicir, PDF e podédela descargar dende a web de http://www.cabodecruz.org para tela nos vosos ordenadores persoais. Dende esta web podedes acceder a un contido que anteriormente só era para socios da entidade, e que agora se quer facer público. A revista ten un contido, pensamos que interesante para todos, no que podedes atopar diversas novas de prensa, escritos, fotos, entrevistas, etc.

Asi que animádevos a descargala e a implicarvos no que acontece na vila de Cabo de Cruz. Se antes era por falla de información, agora é por información de abondo para todos e todas vós.

Aquí temos a todo un home que fixo da nosa lingua algo que moitos, aínda a día de hoxe non queren recoñecer e son os mesmos que nos negan o dereito a vivir en galego. Este vindeiro luns, como motivo deste día en homenaxe a este escritor xa consagrado co seu día, haberá tamén unha mobilización para tódolos galegos e galegas que están en contra do decreto actual imposto polo señor Núñez Feijoo. Un decreto que nos impide facer unha vida completamente en galego a nós, á xente daquí e dacolá.

Cabo de Cruz non vai quedar no anonimato neste día, xa que na nosa vila, todos ou case todos falamos o galego, un galego herdado polos nosos pais, avós, tíos e amigos. Un idioma que nos veu nacer, que nos serviu para desenvolver a nosa infancia na nosa terra, que nos fai grandes aló a onde imos e que de seguro nos verá morrer. Aínda queda moito por facer neste ámbito, e mañá é o día de dicirlle ós nosos dirixentes que o noso idioma para nós é tanto ou máis importante có castelán, un idioma que veu de fóra e que trata de arrebatarnos o que é noso: o galego.

Porén, a todos os que aquí entrades pídovos que acudades ó apoio da nosa lingua, que na casa non se fai nada, que hai que saír ahí a fóra e dicirlle o que queremos. Para que non chegue o día no que pechen esta web por ser íntegramente en galego, para que os noso fillos, netos e bisnetos sexan galegofalantes e amen a nosa lingua como nós o facemos, porque en galego, podemos!

A manifestación sairá da Alameda de Santiago de Compostela este luns para percorrer as rúas da cidade e rematar na praza do Obradoiro. Achégate, porque o galego une!