Cofradía de Pescadores de Cabo de Cruz

Foto de C. QUEIJEIRO

Esta foi unha mala tempada para os mariscadores do Cabo da Cruz pola baixa nas colleitas de bivalvo con respecto ó ano pasado. Pasaron este ano ó pé dunhas 276 toneladas frente ás 319 do ano pasado.

Toda a xente do mar é consciente das perdas deste ano, pois as 43 toneladas de menos que se colleron este ano fixéronse notar moito nos petos dos mariscadores e tamén na economía local. Nesta campaña obtívose unha facturación duns 2,6 millóns de euros, cando o ano pasado superáronse ben os 3 millóns. Estamos a falar de cantidades importantes que inciden directamente nas vidas da xente que se adica a esta actividade.

Os dirixentes da Confraría achacaron estas perdas a dous principais factores: o furtivismo e tamén o mal tempo que fixo que moito marisco morrese.

O patrón maior, Carmelo, indicou que os bañistas este ano tocaron bastante as praias para levarse unha boa tandada de marisco que a xente do Cabo da Cruz sementa para a súa posterior colleita. Sinalou tamén ás bandas que organizadamente extraen o marisco das praias burlando así a presencia dos vixilantes. Pero matiza que ultimamente o furtivismo descendeu pola presenza do persoal da Xunta de Galicia nas nosas praias.

Os temporais deste inverno tamén foron un bo pau para a materia prima das praias. O patrón comentou que na desemboradura do río Coroño morreu unha chea de marisco, concretamente de berberecho e ameixa babosa debido ás grandes cantidades de auga doce que chegou ó mar.

Finalmente o balance deste ano foi claramente negativo, pero as esperanzas para o ano que ven sempre son maiores, pois isto tense que convertir nun medio de vida seguro e productivo para as familias do Cabo da Cruz. O esmero e adicación da nosa xente de seguro vai facer que este traballo sexa un punto fundamental da nosa economía.

O longueirón. Un producto un tanto descoñecido nos locais hostaleiros da zona, é un aliciente á nosa gastronomía polo seu parecido razoable coa famosa navalla. Son similares, tan só que a navalla ten unha forma curva e o longueirón é recto. Porén, a entidade mariscadora do Cabo da Cruz chegou á decisión de que a campaña de recollida desta especie comece no mes de abril.

Segundo as aclaracións de Carmelo, o noso patrón maior, a recollida do bivalvo fai que os mariscadores saquen así un pequeno soldo a maiores, enrriba do soldo obtido pola recollida da ameixa. Tamén indicou que a campaña pasada tivo éxito, pois chegou a venderse a uns 3 € o quilo e púidoselle sacar a rendabilidade debida.

Esta especie recóllese, segundo o patrón, para preservar así os bancos de ameixas, pois antes a xente podía ir á praia e recoller o longueirón libremente. Namentres que agora, a súa captura está só indicada para o persoal da confraría.

Os mariscadores (que non son moitos) que se adican a extraer este marisco, fano con sal, xa que coa espita temen rompelo e que despois non lles sirva para a súa posterior venda e facer así deste producto un novo medio de explotación dos nosos areais.

Trala visita de onte ó Cabo da Cruz da conselleira do mar, hai que sacar conclusións da súa visita ós pósitos que avalan á nosa xente que vive do mar. Tralas xuntanzas cos distintos persoeiros e patróns maiores das confrarías, Rosa quixo recalcar nos principais problemas que ten o sector na actualidade.

En canto ó furtivismo sinalou que a consellería xa ten posto en marcha un plan de actuación co que aínda non está contenta a pesares de que o nivel de roubos nas praias descendeu como afirmou algún patrón maior. A conselleira tamén fixo un chamamento á opinión pública para que a xente non lles compre ós furtivos, e que se vaian a mercar ós lugares autorizados para as ventas. Deste xeito preténdese erradicar este problema dende a súa raíz.

Recoñecéronse tamén as caídas dos prezos que está a sufrir o sector nos últimos tempos e que para iso plantéxase a posta en marcha dunha confraría a nivel comarcal para así tentar de sufragar un pouco este barco á deriva. Esta xa era unha vella iniciativa das confrarías do Barbanza que volta a tomar auxe nos tempos presentes. Quintana mostrouse leda con esta idea de por un único punto de venda do bivalvo na comarca.

Ainda que hai unha confraría que non está dacordo coa expansión do sector, a conselleira afirma que non se pode obrigar a ninguén a facelo, pero que os que así o desexen poidan seguir adiante co plan.

Estas medidas son positivas e alentadoras para a nosa vila, aínda que os feitos estean por chegar.

No día de mañá, a Conselleira do Mar da Xunta de Galicia fará unha visita ás distintas confrarías da comarca, e entre as que estará a do Cabo da Cruz. Virá para coñecer de primeira man os principais problemas dos sectores da comarca e así ter constancia do que acontece nos nosos portos e lonxas.

Comezará a súa visita na confraría de Palmeira, logo a Pobra, Cabo da Cruz e finalmente Rianxo. Irá acompañada do seu gabinete, e agárdase que sexa recibida polos patróns maiores e polas directivas dos pósitos visitados.

Como moitos xa sabemos, na época do verán producíronse sitaucións nada favorables para a xente que vive da praia, do marisqueo concretamente. Estamos falando dos roubos do marisco por parte dos amigos do alleo. Estes amigos actúan en forma de furtivos, de grupos organizados e mesmo de bañistas que se agochan entre a multitude para encher os bolsillos de berberechos e ameixas. Parte do marisco sementado no seu tempo para a posterior colleita foi saqueado das praias sen que isto levase o proceso e destino polo que foi sementado.

A directiva da Confraría do Cabo da Cruz sinala que houbo xente que coas cantidades de marisco extraído da praia chegou a pagar o piso, xa que a retirada de miles de quilos de bivalvo foi crucial para que a día de hoxe os mariscadores vexan mermados os seus topes de capturas, conlevando isto a unhas perdas en parte agardadas.

As perspectivas antes da época estival eran bastante boas, pois as praias prometían abundantes colleitas, xa que o marisco que había antes do verán era suficiente para facer o que se lle chama un bo agosto. Posteriormente, o agosto parece ser que o fixeron os furtivos e os bañistas que sacaron grandes cantidades de marisco das praias.

Ermitas Pérez, a presidenta dos mariscadore de a pé afirmou que as grandes cantidades extraídas das praias non permiten a incorporación de novos mariscadores que serían novos postos de traballo debido a que o marisco non chega para todos. As perdas destes acontecementos son elevadas, xa que a pesares do marisco extraído hai que sumarlle agora a reducción de quilos nas colleitas diarias que fan as nosas xentes que viven do mar.

De toda a ría da Arousa, a entidade crucense é a que máis invirte en seguridade e vixilancia das nosas praias, pois os niveis de furtivismo acadados na última tempada requiren de todo isto e máis para que as extraccións e roubos de marisco sexan despreciables ou nulas. No obstante a actividade segue, a pesares das distintas e difíciles situacións que acontecen na vila.

A Confraría do Cabo da Cruz sinala no día de hoxe que no marisqueo de a pé os prezos aguantársonse durante o luns e mailo martes. Segundo as afirmacións de Ermitas Pérez, presidenta da entidade, o berberecho máis caro foi vendido a uns 8 euros con 90 céntimos o quilo, igual có venres pasado. Por outra banda, a ameixa babosa tampouco variou moito o seu prezo de venta, pois entre esta semana e a pasada pagouse a un prezo de entre 10 e 15 euros.

Onde se percibiron variacións nos prezos  dos mariscadores de a pé foi na ameixa fina. A presidenta dixo que caeu uns cinco euros o quilo, pasando así dos 45 € da semana pasada ós 40 € asinados nesta semana. Agárdase que polo menos os prezos se manteñan, xa que tamén se estima que a demanda non descenda nestas datas.

Como foron frecuentes, as choivas destes días fixeron que toneladas de vexetación acuática se concentrasen nas nosas praias coma un manto verde que o cubre todo.

As reaccións foron inmediatas por parte da xente que traballa as praias, entre elas os mariscadores da Confraría do Cabo da Cruz. Aínda que isto é un proceso natural, que fai falla para a continuidade do ecosistema, pode matar unha cantidade considerable de bivalvo.

Ante esta situación, o póstio crucense está adoptando medidas para dar solución ó problema, tratando de retirar as algas que poidan matar o marisco, e interromper así a actividade acuícola. Nos vindeiros días, unha máquina especializada nestas tarefas de retirada porase a choiar para evitar que isto vaia a máis.

Polo momento, o problema parece que non é moi importante a pesares das medidas adoptadas como precaución. Mesmo o tempo parece que maina cara a tarde de hoxe e non se preve que isto volte a producirse. Ante a situación, a Confraría tomará as medidas oportunas para que a súa actividade non se vexa desviada por estes procesos naturais.

Dende os aposentos de Rosa Quintana, na Consellería do Mar de Galicia descartan que haxa que emprender medidas adiccionais de seguridade polos altercados vividos fai días e dende fai tempo no Cabo da Cruz. Pese a isto, dende a organización marisqueira, non que quixo acendelo lume afirmando que «Confiamos plenamente na consellería e agardamos que ó final se regulen os mecanismos oportunos para que se erradique, dunha vez por todas, esta praga».

Moitos profesionais do sector marisqueiro teñen medo, e mesmo as súa integridade física corre certo perigo ó afirmar que cada vez, os furtivos vólvense máis agresivos, e mesmo van á praia armados con pedras e paus. Con esta situación, vívese certo medo entre o colectivo que pensa que hai que tomar medidas dunha vez por todas, a pesares de que estas medidas non sexan abarcadas dende a Xunta.

As verbas do patrón maior, Carmelo Vidal, asentan o dito: «Nas últimas fechas vense observando certo grado de profesionalización nos furtivos. Xa non son persoas illadas que van ós bancos marisqueiros a coller o molusco. Agora son grupos organizados, formados por cinco ou seis individuos, que non temen ós vixilantes». Engadindo así: «Esta forma de actuar débese a que os ilegais saben que en cada vehículo do pósito van dúas persoas e aproveitan esta inferioridade numérica para actuar impunemente».